Police car ninakaw, nang-araro: 3 pedestrian patay!
MANILA, Philippines — Tatlong pedestrian ang patay habang anim pang katao ang sugatan, nang araruhin ng isang police car na ninakaw ng isang umano’y “sintu-sinto” sa Morong, Rizal kahapon.
Hindi naman kaagad nakuha ang pagkakakilanlan ng mga nasawing biktima na nagtamo ng pinsala sa ulo at katawan.
Samantala, arestado na ang 57-anyos na suspek na nagmamaneho ng police car, na sinasabing may diperensiya sa pag-iisip.
Base sa ulat ng Rizal Police Provincial Office (RPPO), dakong alas-10:45 ng umaga nang maganap ang insidente sa Tomas St., sa Brgy. San Juan.
Ayon sa mga pulis, ginagamot ang suspek sa Municipal Disaster Risk Reduction Management Office nang tumakas ito.
Ninakaw umano ng suspek ang isang police car ng Morong Police Station na nakaparada sa lugar at saka humarurot palayo.
Kaagad namang rumesponde ang mga pulis at tinugis ang suspek.
Gayunman, bumangga ang police car sa isang poste at inararo ang mga pedestrian sa lugar, na nagresulta sa pagkamatay ng tatlo at pagkasugat ng anim na iba pa.
“A man with a mental problem being treated at the Municipal Disaster Risk Reduction Management Office escaped and then seized the parked mobile car of the Morong PNP,” anang RPPO.
“Police immediately responded and chased the car until they hit a post and the victims,” dagdag pa nito.
- Latest
