Suspek sa road rage sa Quezon City, arestado!

MANILA, Philippines — Naaresto na ng Quezon City Police District (QCPD) ang suspek sa naganap na road rage nitong Hulyo 2 sa tapat ng isang Chinese Restaurant na ikinasugat ng kanyang nakaalitan sa Quezon City.

Kinilala ni QCPD director, PBrig. Gen. Redrico Maranan, ang suspek na si Edwin de Javing Bautista, 52-anyos ng Navotas City.

Batay sa ulat ng pulisya, sakay ni Badze Laguidit ng Toyota Vios ang biktimang si Kimrana Hamidul, 38, at dalawang menor-de-edad at tinatahak nila ang Quezon Ave. sa Brgy. Dona Josefa nang masagi ng Nissan Navara na minamaneho ni Bautista ang side mirror ng una.

Sa halip na huminto, umarangkada si Bautista kaya’t hinabol siya at hinarang ng mga biktima at umabot sa tapat ng Ma Mon Luk restaurant. Dito, bigla na lamang naglabas ng baril si Bautista at pinaputukan ang sasakyan ng mg biktima na nagresulta sa pagkakasugat ni Hamidul sa paa saka mabilis na tumakas ang suspek.

Ayon kay Maranan, katuwang ang Police Station 11 sa pamumuno ni PLt. Col. Joseph Dela Cruz, agad na ikinasa ng Criminal Investigation and Detection Unit (CIDU) ni PMaj. Don Don Llapitan ang mga follow-up operation kabilang ang beripikasyon ng may-ari ng Nissan Navara sa Land Transportation Office (LTO) at sa PNP-Highway Patrol Group sa Camp Crame, Quezon City.

Alas-12 ng tanghali kamakalawa nang masakote si Bautista na positibo namang kinilala ng mga biktima.

Lumilitaw na may nakabinbing warrant of arrest si Bautista sa Branch 3, Fourth Judicial Region, Municipal Trial Court in Cities (MTCC), sa Antipolo City, Rizal sa kasong estafa.

Nahaharap ang suspek sa kasong Attempted Murder sa Quezon City Prosecutor’s Office.