Rota sa fluvial procession sa Birhen sa Regla gipamub-an
CEBU, Philippines — Liboan ka mga deboto ang niapil sa tinuig nga fluvial procession sa Nuestra Señora de Regla sa Dakbayan sa Lapu-Lapu Lapu-Lapu kagahapon isip kabahin sa pagsaulog sa ika-291 nga kapistahan sa maong patrona sa siyudad.
Base sa talaan sa Lapu-Lapu City Police Office (LCPO) gibana-bana nga kapin sa 2,000 ka deboto ang niapil sa maong relihiyosong kalihokan.
Karong tuiga, nibalik ang fluvial procession sa rota nga Marigondon Wharf nga mas mubo itandi sa gigamit sa niaging tuig, matud ni Lapu-Lapu City Mayor Ma. Cynthia “Cindi” King-Chan.
Matud ni King-Chan nga gikonsidera ang kahimtang sa ekonomiya sa nasud sa pagdesisyon nga pamub-on ang rota sa prosisyon.
Iyang gipasabot nga pinaagi sa mas mubo nga rota, nahimo ang prosisyon sa husto ug gitakdang oras samtang nakunhoran usab ang gasto sa mga sakayan nga niapil.
Gipadayag sa mayor nga sa niaging tuig nagsugod ang fluvial procession sa Cordova Roll-On/Roll-Off (RORO) Port padulong sa Muelle Osmeña Port.
Bisan pa sa pag-usab sa rota daghang sakayan ang niapil sa prosisyon lakip niini ang 12 ka bangka, siyam ka speedboat, unom ka jet ski ug usa ka fast craft.
Niapil usab ang Philippine Navy, Philippine Coast Guard ug ubang mga uniformed personnel aron motabang sa siguridad ug pagdumala sa maong kalihokan.
Gisakay ang imahen sa Nuestra Señora de Regla sa M/V Princesa sa Metro Ferry Inc. sa paggikan niini sa Marigondon Port ug paglibot sa kadagatan sa Mactan.
Niagi ang prosisyon sa kabaybayonan sa mga barangay sa Maribago, Agus, Mactan, Punta Engaño, Ibo ug Pusok lakip sa duha ka tulay sa Mactan Channel sa wala pa kini midunggo sa Muelle Osmeña Port sa Barangay Poblacion.
Gikan didto, nipadayon ang mga deboto sa foot procession padulong sa Nuestra Señora de Regla Parish National Shrine diin gipahigayon ang opening mass alang sa ika-291 nga kapistahan sa patrona. (BANAT NEWS)
- Latest
