Mapagan ang hulmigas

Gihatagan sa Japan ang Pilipinas og usa ka military coastal radar system ug mga surveillance drones aron makatabang pagsubay sa mga sakyanang pandagat, isip kabahin sa 4.3 billion Japanese yen nga grant sa maong nasud ngadto sa Pilipinas. Gisaway sa China ang maong programa nga gitawag niini nga pagbuhat og security network palibot sa China nga gi-disguise  isip development aid.  Gihatagan kita’g hinabang apan sa tinuoray gihimo lamang kita nga pawn sa away tali sa mga gamhanang nasud.  Mao kanay giingon nga, “Kon mag-away gani ang mga elepante, hasta ang hulmigas sa ubos, mapagan.”  Muleeng!

Battery sa dulaang buaya

Mitestigos si Navotas Rep. Toby Tiangco atubangan sa Sandiganbayan, atol sa bail hearing ni kanhi Speaker Marting Romualdez, nga ang mga kongresista kinahanglan mobayad og 20% nga taripa aron lamang makakuha og dugang pundo gikan sa 2025 House General Appropriations Bill ug GAA.  Si kanhi Speaker Romualdez ug si Rep. Zaldy Co kuno ang duolon alang ni’ng maong transaksyon.  Kon tinuod kini, grabe gyud diay ang pangwarta sa duruha ka gitumbok nga mastermind sa flood control scam.  Mao kanay giingon nga, “Nahisama ang 20% nga taripa sa battery nga maoy mopagimok sa ilang dulaan nga mga buaya-buaya.”  Fezteleern!

Paspas molista, dugay mo-ayuda

Matud pa ni Cebu Provincial Planning Officer Elizar Sabinay Jr., ubos sa “Amping Sugbo” program sa dakbayan, ang mga Sugbuanon nga nangita of dinalian nga financial assistance mahatagan na sa ilang hinabang sulod lamang sa labing taas, 21 ka adlaw gikan sa pag-apply hangtud sa pag-isyu sa cheke.  Dugay gihapon ang 21 ka adlaw, apan dako na kini nga improvement sa naandan nga 3 ka buwan kanhi nga processing.  Kay matud pa sa usa ka capitol observer, Paspas lang sila mokuha sa imong personal data, apan hinay mohatag sa aktwal nga ayuda.”  Ateerr!

Dili aron madato

Matud pa ni Education Secretary Sonny Angara, ang ipanghatag nga mga MacBook laptops ngadto sa mga maestra dili mahimo’ng mabaligya o maprenda.  Kinsa kadto’ng mosuway pagbaligya niini mahimong mag-atubang og kaso’ng kriminal ug administratiba.  Nagpaila ba ang pamahayag sa kalihim sa kultura sa mga magtutudlo diha sa DepEd?  Sa kahimtang sa atong mga magtutudlo karon, lahi na ang meaning sa ATM: dili na automatic teller machine kon dili, Ang Teacher May-utang.  Matud pa sa usa ka teacher, “Wala man mi magtudlo aron madato. Gani hangtud karon wa man jud mi madato.” Pagkatoytoy!

Pagpa-usbaw sa buhis

Mipasidaan si Dean Jonathan P. Capanas sa University of San Jose-Recoletos School of Law nga ang pagpa-usbaw sa bulohisan taliwala sa krisis mahimo’ng makahatag og dugang palas-onon sa mga negosyante ug magbubuhis ug walay kaseguroan nga makatigom og dugang pundo sa dakbayan.  Adunay katungod ang LGU nga mopa-usbaw sa buhis apan wala kini buhata sa nangagi’ng 20 ka tuig.  Kay matud pa lage, “Ang hiyas sa pagpa-usbaw sa buhis nahisama sa abilidad sa pagpangibot sa balhibo sa manok sa paagi nga dili kini mokakak sa kasakit.”  Madahaan!