FiberXers amoy na ang semis
MANILA, Philippines — Muling pinatumba ng Converge ang Rain or Shine, 105-89, sa Game Three para agawin ang bentahe sa kanilang quarterfinals series sa Season 50 PBA Governors’ Cup kahapon sa City of Dasmariñas Arena sa Cavite.
Kumonekta ang FiberXers sa 2-1 lead sa kanilang best-of-five showdown ng Elasto Painters na tinalo rin nila sa Game Two, 130-125.
Kumolekta si guard Juan Gomez de Liaño ng 19 points, 13 rebounds at anim na assists para banderahan ang Converge ni coach Delta Pineda na nakahugot kay import Cameron Clark ng 18 markers.
“It boils down to preparation. Throughout the game we stayed composed, we stayed locked in and the small details that really mattered,” ani De Liaño. “I think we really emphasized a lot on our defense.”
Nagdagdag si Justine Baltazar ng 15 points kasunod ang tig-13 markers nina Calvin Abueva at Jomel Policarpio para makalapit sa kanilang kauna-unahang semifinals stint.
Nakatakda ang Game Four sa Biyernes sa Smart Araneta Coliseum.
Naghihintay ang NLEX, winalis ang Phoenix, 3-0, sa quarterfinals, ng makakalaban sa best-of-five semis series.
Tumipa si Adrian Nocum ng triple-double na 11 points, 11 rebounds at 11 assists sa panig ng Rain or Shine, habang may 18 points si Felix Lemetti kasunod ang tig-16 markers nina Caelen Tiongson at rookie Deo Cuajao.
Nalimitahan si import Aaron Fuller sa apat na puntos, ngunit humablot ng 13 boards.
Nakipagsabayan ang Elasto Painters hanggang sa pagtiklop ng third period, 75-82, bago kumawala ang FiberXers sa 92-77 sa 6:33 minuto ng fourth quarter mula sa jumper ni Clark.
- Latest
