Abad ni-inspeksyon sa mga sam-ang

CEBU, Philippines — Nagpahigayon og inspeksyon si Police Regional Office 7 (PRO7) Director Police Brigadier General Arnold Abad sa nagkadaiyang sementeryo sa Metro Cebu aron pagsusi sa kahapsay ug kalinaw atol sa pagsaulog sa Adlaw sa mga Santos kagahapon, Nobyembre 1 ug para karong adlawa sa adlaw na gyud sa Kalag-Kalag.

Personal nga gibisita ni Abad ang Calamba Public Cemetery sa V. Rama Avenue, Calamba, dakbayan sa Sugbo; Saint Joseph’s Parish Roman Catholic Cemetery sa 710 del Pilar Street, Barangay Guizo, Mandaue City; Lapu-Lapu City Catholic Cemetery sa Humay-Humay Road, Barangay Gun-ob, Lapu-Lapu City; ug Benevola Memorial Garden sa Barangay Pulpogan, Consolacion.

Atol sa paglibot, gisusi ni Abad ang aktuwal nga nahimutangan sa mga polis, lakip na ang pagpatuman sa mga lakang sa seguridad ug mga plano sa operasyon.

Gisuta usab niini ang pagkaandam sa mga kapulisan sa pag-atubang sa posibleng mga problema sa seguridad ug paghatag dayong tabang sa mga bisita sa sementeryo.

Matud ni Abad, dili lamang kutob sa pagdeploy sa mga pulis ang responsibilidad sa kapulisan, kondili kinahanglan usab nga masiguro nga makita, alerto ug andam silang motubag sa panginahanglan sa publiko.

Gipahimangnoan usab sa PRO7 ang publiko nga magmatngon sa ilang panglawas tungod sa El Niño nga risgo sa mga sakit nga may kalabotan sa sobrang kainit.

Gidasig ang tanan nga magdala ug moinom kanunay og tubig aron malikayan ang dehydration, magsul-ob lang og luag nga sapot, magpayong o magkalo aron di mabuwad sa init.

Mopasilong dayun kung bation og kahapo o kakutas tungod sa kainit ug moduol sa mga polis o medical personnel nga nagbantay.

Dili magpasaya-saya sa ilang mga gamit ug mga gadgets, alahas ug kwarta aron malikayan ang pagpangawat.

Gidasig usab ang mga pamilya nga bantayan ang ilang mga anak ug magtakda og lugar nga tagboanan kun adunay mabulag sa ilang kauban.

Karong adlawa, padayunon ni Abad ang paglibot sa mga sam-ang. — /IBM (BANAT NEWS)