Maguwang gitigbas sa igsuon

CEBU, Philippines — Naangol ang usa ka 30-anyos nga lalaki human giingong gitigbas sa iyang 22-anyos nga manghod samtang nagkaon sa ilang balay sa Purok Camote, Barangay Ilaya, lungsod sa Ronda, Cebu, pasado alas 8:30 sa gabii niadtong Lunes, Oktubre 26.

Ang biktima giila lamang sa alyas Nilo, samtang ang giingong suspek mao ang iyang manghod nga si alyas Dan, usa ka trabahante. Silang duha lumulupyo sa maong barangay.

Base sa inisyal nga imbestigasyon sa kapulisan, sumala sa pahayag sa ilang inahan nga si alyas Solidad, naglalis ang managsoon niadtong Domingo, Oktubre 25.

Giingong misulod sa ilang balay ang suspek, nga gikatahong nakainom og makahubog nga ilimnon, ug kalit lang gitigbas sa makadaghang higayon ang iyang maguwang gamit ang sundang samtang nagkaon kini. Nakaangkon ang biktima og daghang samad sa nagkalainlaing parte sa lawas ug gidala sa Barili District Hospital.

Nadakpan hinuon dayun ug gidala usab sa Ronda Municipal Police Station ang suspek ug ang giingong gigamit nga sundang alang sa hustong kustodiya ug pagproseso.

Padayon ang imbestigasyon sa kapulisan aron matino ang hinungdan sa panaglalis sa managsoon ug ang mga sirkumstansya nga mitultol sa pagtigbas sa biktima.

Wala pay dugang detalye bahin sa kasamtangang kahimtang sa biktima ug sa posibleng kaso nga ipasaka batok sa suspek.  IBMc BANAT NEWS