Motukob gyod

Gibulgar sa Peoples Budget Coalition nga civil society group nga sa ilang pagsusi sa nasudnong budget nga giaprobahan sa Ubos Balay Balauranan ug gituki na karon sa Senado, ilang nakita ang mga kuwestiyonable nga alokasyon nga kun kopyahon sa Senado mahibalik gihapon ang pangilkil sa budget sa gobyerno.

Mausban ang flood control controversy apan lahi nalang ang pangalan ug kini mao ang farm-to-market road nga gisuksok sa mga kongresista sa budget sa Drpartment of Agriculture infrastructure project nga nagkantidad og P190 bilyones.

Si Ken Abante sa Peoples Budget Coalition mibulgar nga ang mga kongresista misuksok sa budget nga gisumitir ngadto kanila sa mokabat og 7,054 ka mga proyekto nga mikantidad og P190 bilyones diin nalakip niini ang mokantidad og P15 bilyones nga farm-to-market roads ug irrigation projects nga walay public posted attachments.

Aduna pod kini gisukdok nga 355 ka mga bagong proyekto nga nagkantidad og P6 bilyones nga wala pod maapil sa gisumitir sa Malakanyang nga National Expenditure Program sama sa mga dalan nga nagkantidad og P5. 10 ug P15 ka milyon nga wala masayri konektado ba kining maong mga dalan sa national highway o padulong ba ngadto sa mga resorts sa mga kongresista.

Aduna pod kini gisuksok nga laing 319 ka mga irrigation projects nga nagkantidad og P9.4 bilyones nga basi sa mga dokumento ug pagsusi sa prisyo sa mga solar panel para sa irrigation nagkantidad lamang kini og P7,000 apan sa dokumentong gisumitir gipatungan ang prisyo niini ngadto na sa tag P40,000.

Aduna usab farm-to-market roads nga wala sa yuta kay anaa kini sa dagat sama pananglit sa P23 milyones nga farm-to-market roads alang sa Nueva Ecija nga ang coordinates niini anaa makita sa Benham rise , P30 milyones nga farm-to-market roads sa Cebu nga ang coordinates anaa mahimutang sa Selebes Sea duol sa Indonesia ug P55 milyones nga farm to market roads alang sa Quezon pero ang coordinates anaa sa kadagatan sa Brunei.

Si Department of Agriculture Secretary Francisco Tiu Laurel miingon nga walay angayan kabalakan kay typographical error lamang kuno kini. Motuo mo? Ang klaro mao nga ang administrasyong Marcos mangita gyod og mga pamaagi unsaon sa pagtukob sa kuwarta sa gobiyerno.