Mga minor namato kay wala hatagi og limos

CEBU, Philippines — Lima ka menor de edad ang gidala sa kustodiya sa mga kawani sa Mandaue City human mireklamo ang publiko sa giingong pagpanglabay nila og bato ug botelya sa mga tawo nga dili mohatag og limos duol sa usa ka restaurant sa D.M. Cortes Street, Barangay Alang-Alang. Matud ni Gerard Glenn “RD” Soon Gobalani, team leader sa City Mayor’s Office-Safety Maintenance Area Response Team (CMO-SMART), nahitabo ang operasyon niadtong Miyerkules sa gabii, Oktubre 14.

Si Gobalani miingon nga sulod sa miaging mga adlaw, ang mga bata nagtapok duol sa usa ka fast-food chain ug restaurant diin mangayo sila og limos sa mga kustomer ug mga lumalabay.

Apan kon dili sila hatagan og kuwarta, giingong manglabay sila og bato ug botelya o manghapak sa mga tawo.

“Ang ilang buhaton manglimos, then kung di sila mahatagan sa ilang gusto, that’s the time nga mu-violent sila, so manglabay or manghapak,” matud ni Gobalani.

Niadtong Martes, Oktubre 13, usa ka empleyado sa restaurant ang giingong naigo sa ulo sa bato nga gilabay sa usa sa mga menor de edad. Human sa insidente, nangayo og tabang ang management sa restaurant sa CMO-SMART, hinungdan sa gihimong operasyon.

Kauban sa operasyon ang mga sakop sa Mandaue City Police Office (MCPO) ug City Social Welfare Services Office (CSWSO), ilabina kay mga menor de edad ang nalambigit.

Gigamit usab sa CMO-SMART ang CCTV footage gikan sa restaurant ug Barangay Cambaro aron pag-ila sa mga bata. Sumala ni Gobalani, ang mga menor de edad nag-edad og 10 hangtod 12 anyos ug mga residente sa maong barangay. Human niini, gidala sila sa ilang tagsa-tagsa ka puy-anan diin nakigkoordinar ang mga personahe sa ilang mga ginikanan ug sa CSWSO. Usa sa lima ka bata ang gidala sa Hope of Mandaue Enhanced Home Children’s Center sa Barangay Basak, usa ka pasilidad alang sa mga bata nga nalambigit sa paglapas sa balaod.

Matud ni Gobalani, girekomendar sa social worker ang pagdala sa maong bata sa pasilidad tungod sa giingong balik-balik nga pagkalambigit niini sa susamang mga insidente.

Ang upat ka laing menor de edad gitugyan ngadto sa ilang mga ginikanan, nga gipahimangnoan sa ilang responsibilidad sa paggiya ug pagdumala sa ilang mga anak.

Sukad kagahapon, wala pa’y kaso nga gisang-at apan giingong andam ang tag-iya sa restaurant nga mopadayon sa legal nga aksiyon tungod kay naangol ang usa sa ilang empleyado.

Gawas sa insidente sa Alang-Alang, nakadawat usab og mga reklamo ang Anti-Mendicancy Task Force sa CSWSO gikan sa mga motorista bahin sa mga bata nga manglimos daplin sa A.C. Cortes Avenue.

Giingong hapakon usab sa mga bata ang mga sakyanan kon dili sila hatagan og kuwarta sa mga motorista, matod ni Gobalani. MEL BANAT NEWS