600 metal detectors para sa public schools

CEBU, Philippines —  Gipalig-on sa Cebu Provincial Government ang seguridad sa mga public high schools pinaagi sa paghatag og 600 ka metal detectors nga ipang-apod-apod sa mga eskwelahan sa tibuok probinsya.

Gipangunahan ni Cebu Gov. Pamela Baricuatro ang ceremonial turnover sa 600 ka metal detectors ngadto sa Department of Education (DepEd)-Cebu atol sa Unified Action Against School Violence nga gihimo sa Capitol Social Hall niadtong Martes, Sept. 29, 2026.

Ang mga metal detectors gamiton sa mga public high schools isip dugang nga safety measure aron mapalig-on ang seguridad sulod sa mga eskwelahan ug malikayan ang posibleng insidente sa violence.

Mga 200 ka representante gikan sa nagkalain-laing government agencies, education sector, school administrators, ginikanan ug community stakeholders ang mitambong sa maong kalihokan.

Matud ni Baricuatro, responsibilidad sa provincial government nga maandam ang Cebu sa posibleng mga risgo sa dili pa kini mahimong emergency, apan isip inahan, mas simple ang iyang tumong—ang kaluwasan sa mga kabataan.

“As governor, it is my responsibility to prepare Cebu for risks before they become emergencies. But as a mother, it is much simpler. I want our children to be safe. I want them to walk into school thinking about their lessons, their friends, their dreams, and what they want to become someday—not whether something bad might happen to them,” matud niya.

Gipasalamatan usab ni DepEd Cebu Province Schools Division Superintendent Dr. Senen Paulin ang provincial government tungod sa maong inisyatiba nga, matud niya, makatabang sa pagpanalipod dili lamang sa mga estudyante kondili apil usab sa mga magtutudlo, school heads ug non-teaching personnel.

“We are very blessed that in Cebu Province, we have a leadership who truly cares for every Cebuano, especially our young Cebuanos,” matud ni Paulin.

Kabahin sa Cebu Safe Schools Program ang paghatag sa mga metal detector. Kini nga programa gitukod pinaagi sa Executive Order No. 35 nga gipagawas ni Baricuatro niadtong Hunyo 25, 2026.

Tumong sa programa nga mapugngan ang school violence ug bullying, mapalig-on ang emergency preparedness, ug mahatagan og mental health ug psychosocial support ang mga learners.

Atol sa kalihokan, gipirmahan usab ang Pledge of Commitment isip pagpasiugda sa hiniusang responsibilidad sa mga ahensya sa gobyerno, eskwelahan ug komunidad sa pagmintinar sa kaluwasan sa mga learning environment.

Apil sa mga ahensyang mitambong ang DepEd, Cebu Police Provincial Office (CPPO), Provincial Disaster Risk Reduction and Management Office (PDRRMO), Armed Forces of the Philippines (AFP), Philippine Drug Enforcement Agency (PDEA), Bureau of Jail Management and Penology (BJMP), Philippine Coast Guard (PCG), Bureau of Fire Protection (BFP), ug Department of the Interior and Local Government (DILG).

Samtang, mitaho si CPPO Director Police Colonel Abubakar Mangelen Jr. nga nasulbad na sa kapulisan ang tanang 22 ka school-related incidents ug online threats nga nadawat niini pinaagi sa School Defense System.

Sa maong 22 ka kaso, 11 ang nalambigit ang mga menor de edad ug gi-refer kini ngadto sa ilang tagsa-tagsa ka City ug Municipal Social Welfare and Development Offices. Duha usab ka kaso ang na-file sa korte—usa ubos sa Presidential Decree No. 1727 o Anti-Bomb Joke Law, ug usa alang sa Grave Threats in relation to Republic Act No. 10175 o Cybercrime Prevention Act of 2012.

“The police cannot do this alone. That is why, through the leadership of our provincial government, led by our Governor Pamela Baricuatro, we initiated this multi-agency approach—a united action against school violence and any other online threats to make sure that we will not lose any precious life, most especially our children, our students, our learners,” matud ni Mangelen.

Nangapud-apod usab ang CPPO og mga wristband nga adunay 911 emergency hotline number ngadto sa mga estudyanteng mitambong sa kalihokan isip pahinumdom nga aduna silay matakdan kung gikinahanglan nila ang tabang.