Ngano man kini mayor?

Nakabisita ko sa dapit kilid sa among opisina sa The Freeman/Banat News diha sa downtown area sa Cebu City niadtong Huwebes, ug nakabantay ko nga wa man ipadayon ni Mayor Nestor Archival ang kampanya paghawan sa 3-meter easement gikan sa tampi sa sapa.

Ang kadagkoan sa Philippine Star-The Freeman miguba dayon sa ilang sementadong kural nga gitukod sa tampi sa sapa kay mao man kini ang balaod, apan gipasagdan ra man sa administrasyon ni Mayor Archival ang ubang business establishment nga wa moguba sa ilang kural daplin sa sapa.

Resulta, nagpabilin nga wa gyud mahimoi og dredging operation, wa mapalawmi ang maong bahin sa sapa diha likud sa building sa The Freeman nga maoy hinungdan nga kon mag-uwan, mosuyla dayon ang tubig baha.

Kanang sapa nga gitawag og Estero de Parian nga nagsukad sa may eskina Legaspi ug Manalili Street ug mopatighu’g sa dapit sa Pier 3, mao gyud na ang hinungdan nga maglunop diha sa downtown area kon mobunok ang kusog nga uwan.

Unta, molihok na niini si Mayor Archival ug makahinumdom na siya nga nakalimtan niya kining importante unta nga gimbuhaton.

* * *

Kon usa ikaw ka motorista, unya parahon ka sa mga LTO agent, masuko ka ba ug gub-on nimo ang imong sakyanan?

Pananglit kana ang imong buhaton, makaingon ko nga naunsa na imong utok, nga ang motor nga wa pa gani maimpas pagbayad, imo na man hinoon nga giguba.

Ang mga sakop sa LTO nagpahigayon og checkpoint operations didto sa lungsod sa Banga, South Cotabato niadtong July 8. Gipara nila ang tawo nga nagsakay og motorsiklo, gipangitaan sa iyang driver’s license ug rehistro sa motor.

Nasuko ang tawo nga gipara siya ug nga sakmiton ang iyang motorsiklo kay wa siya’y lisensya. Abtik nga mikuha og dakong bato ang tawo ug gigamit kini sa paghapak ug pagguba sa iyang motor.

Nagpaninggit ang maong tawo nga wa pa gani kuno maimpas sa pagbayad ang iyang motorsiklo, ug sakmiton na hinoon sa mga tinugyanan sa LTO.

“Malipay na mo? Wa pa ni maimpas og bayad, inyo ning imbargohon?” matud sa maong tawo nga daw misaka ang iyang blood pressure sa tumang kasuko.

Ang lagda sa Republic Act 4136, Transportation and Traffic Code, ang usa ka sakyanan mahimong i-impound sa LTO kon masakpan nga ang tawo nga nag-drive niini way lisensya, ug kon dunay lisensya apan expire lang ang iyang rehistro sa sakyanan, isyuhan ra kini og TOP ug sakmiton ang lisensya aron pamultahon.