EDITORYAL — Cellphone ban maayo’G tumong

Dili lang si Dumanjug Mayor Guntrano “Gungun”Gica ang gustong i-ban ang mga smartphones ug uban pang gadgets diha sa mga eskuylahan. Apan siya palang ang local chief executive nga nimando alang sa estriktong pagpatuman niini diha sa iyang lungsod.

Apan naa nay daang nasudnong polisiya ang Department of Education (DepEd) kaniadto pa nga nagdili gyud anang paggamit sa mga mobile phones ug electronic gadgets sa mga  estudyante atol sa oras sa tingklase o sa sulod sa ilang mga lawak-saraingan.

Ang polisiya sa DepEd nagdili sa paggamit og cellphones o mobile phones atol sa tingklase, sa ato pa dili bawal ang pagdala og cellphone sa eskuylahan kondili sa ilaha lang classrooms.

Kini ubos sa DepEd Order No. 6, s. 2026 nagmando nga ang mga estudyante ug mga magtutudlo lakip na ubang school personnel gidid-an paggamit og cellphones ug uban pang portable electronic devices atol sa oras sa tingklase.

Pwede lang ni kung gamiton sa ilang aktwal nga leksyon, kun dunay medical o health emergencies.

Pero lahi ang balaudnong giduso ni Senador Win Gatchalian nga Senate Bill No. 627 nga nagtinguhang naa gyuy balaod nga mo-ban sa tanang cellphones sa public ug private schools gikan sa kindergarten hangtud sa senior high school.

Ang balaudnon naglakip sa paglikay sa mga bata gikan negatibong epekto sa mga online gaming, pagbatok sa cyber bullying ug uban pang mga negatibong makat-onan gikan sa social media ug sa internet.

Kaning tanan pulos makaayo para sa mga bata, pero kinahanglan gyud kini tarungon kun unsaon pag-implimentar ug dili lang ipaagi sa pwersa, kinahanglang madawat sa isig ka habig apil sa mga ginikanan.

Kay ang cellphone karong mga panahona dili luho nga gamit kondili panginahanglan na kini sa tanan para sa komunikasyon. Ug ang mga bata nagkinahanglan sab niini para sa ilang pagtuon ug kalingawan.

Ang pag-ban sa cellphones sa mga eskuylahan dili lang diri nahitabo sa Pilipinas,  gipatuman sad ni sa ubang mga nasud sa ilang mga eskuylahan.

Wala gidili ang pagdala og cellphone, ang gidili mao ang paggamit niini sa sulod sa ilang klase atol sa oras sa tingklase.