Duha ka coordinator ug duha ka usher sikop sa managlahing lugar

CEBU, Philippines — Gipangdakop ang duha ka coordinator ug duha ka usher sa ilegal nga swertres sa managlahing lugar sa Probinsya sa Sugbo.

Unang operasyon nahimo didto sa sitio Nangja Barangay Liki, lungsod sa Sogod diin ilang nasikop si Shoji Monzolin, 47 anyos, minyo nga usa ka coordinator sa illegal nga sugal.

Lakip nga nasikop ang usher nga mao si Ruel Lumbab, 57 anyos nga usa ka biyudo.

Si Police Captain Dennis Onasin, hepe sa kapolisan sa Sogod uban sa taga Provincial Intelligence Unit sa Probinsya sa Sugbo maoy nihimo sa operasyon batok sa ilegal nga swertres nga walay permit.

Lain nga nadakpan nga coordinator mao si Serafin Nuñeza Ares, 67 anyos nga taga Barangay Panalipan, lungsod sa Catmon.

Kuyog niya nga nasikop mao ang iyang usher nga nakuhaan og mga kagamitan sa pag isyu og numero. Ang mga dinakpan gipasakaan og kasong kalapasan sa R.A. 9287 o illegal numbers game.

Sa nasayran ang operasyon batok sa ilegal nga swertres gihingusgan ug nagpadayon diha sa Probinsya. (BANAT NEWS)