Lalake nga nanglungkab og panimay ug mikawat sa vault wa pa mailhi

CEBU, Philippines — Padayon pa ang kapolisan sa Lapu-Lapu City Police (LCPO) sa pag-ila sa kawatan nga nag-brief lang nga milungkab sa usa ka panimalay nga nahimutang sa usa ka subdivision sa Barangay Marigondon ug midala sa vault nga gisudlan og dakong kantidad nga salapi.

Sa nasayran ang maong hitabo nakuha sa CCTV ug gi post sa social media hinungdan nga maoy gibasihan sa imbestigasyon sa kapolisan.

Suma pa ni Police Lieutenant Colonel Christian Torres, tigpamaba sa Lapu-Lapu City Police Office (LCPO) nga una nilang gisusi ang ilang mga police station apan wala ikataho ang maong panghitabo.

Sa gihimo nilang imbestigasyon ilang nasayran nga ang maong pagpanglungkab nahitabo niadtong Marso 9, 2025 alas 3 pasado sa kaadlawon.

Sa nakuha nga footage sa CCTV maoy nakita nga ang usa ka tawo nga nagsul-ob lang og brief migawas gikan sa gisulod niining panimalay nga nagpas-an na sa giingong vault nga nga gisudlan og dakong kantidad nga salapi.

Nunot niini si Torres ang nag-awhag sa mga molopyo sa kabarangayan nga kon mabiktima sa pagpangawat sa dili pa-i-post sa social media labing maayo nga unang pagahimoon sa biktima ang pagtaho sa maong hitabo sa kapolisan alang sa dinaliang aksyon. (BANAT NEWS)