Lupon nihangayo usbawan ang ilang pundo ug honorarium

CEBU, Philippines — Ang mga sakop sa board of directors sa League of Lupong Tagapamayapa-Cebu City Chapter nanghangyo kang Acting Cebu City Mayor Raymond Alvin Garcia nga hatagan sila og sakyanan ug patas-an ang ilang pundo matag tuig alang sa training ug mga seminar.

Si Aida Dela Cruz Tampus, pangulo sa League of Lupong Tagapamayapa-Cebu City Chapter nagkanayon nga kapin sa 1,200 ang ilang sakop gikan sa 80 ka barangay sa siyudad.

Buot nila nga patas-an ang ilang pundo gikan sa P1milyon ngadto sa P2.5 milyones aron maoy gamiton sa mga training ug seminar sa ilang mga sakop.

Si Tampus nipasabot kang Garcia nga dili paigo ang P1 milyon alang sa mga training ug workshop sa mga Lupon mao nga nihangyo siya nga usbawan kini ngadto sa P2.5 milyones.

Gawas sa ilang hangyo, buot usab nila nga magpadugang og P2,000 sa ilang binuwan nga honorarium nga ilang madawat gikan sa Dakbayan sa Sugbo.

Sa iyang bahin, si Garcia nipasabot sa BOD sa Lupon nga ang pundo nga iyang gigamit karong tuiga mao pa kini ang gipalabang sa panahon ni suspended Mayor Michael Rama ug kong mapasulod gani ang ilang hangyo adto na kini sa annual budget alang sa 2025.

Kabahin sa mga sakyanan, matud pa grupo nga aduna sila’y multicab apan gubaon na kini ug maglisod na og tangas sa bukid ilabi na kong aduna kini atubangon nga problema ngadto sa bukid.

Apan si Garcia nagkanayon nga iyaha lang una nga ipaayo ang sakyanan diin siya ang mopalit sa mga pisa niini gamit ang kaugalingon niya nga kwarta aron nga adunay magamit ang mga Lupon nga kaugalingong sakyanan o magpatabang siya sa pagpangita og sakyanan nga anaa karon sa Department of General Services.

Sa laing bahin, mapasalamaton ang BOD sa Lupon tungod kay lakip sila sa makadawat og Christmas bonus karong Disyembre.

Matud ni Garcia nga nag-monitor siya sa mga hataganan og bonus karong pasko.

“Nagsige man ko’g monitor nga sa pasko ang hataga’g bonus regular, casual, JO, pero kaning mga honorarium-based wa hatagi. Di ba nga pareha ra man mo tanan nga nanrabaho ra man mo sa gobiyerno, nanerbisyo man mo. So, mao na akong giingon nga for this year I will make it different, nga mo-propose ko’g budget P5,000 for all honorarium-based barangay workers—dili lang kay lupon, tanod, loader, BHW (barangay health workers). Tanan atong hatagan. Ingon ana. We have share it to all of you”, padayag ni Garcia. — /BDB (BANAT NEWS)