PLDT giniba ang Galeries tower
![PLDT giniba ang Galeries tower](https://media.philstar.com/photos/2024/07/20/1_2024-07-20_20-28-49.jpg)
MANILA, Philippines — Pumalo si Russian import Elena Samoilenko ng 14 points galing sa 11 attacks at tatlong blocks para sa 25-19, 25-16, 25-17 pagwalis ng PLDT Home Fibr sa Galeries Tower sa 2024 Premier Volleyball League (PVL) Reinforced Conference kahapon sa Philsports Arena sa Pasig City.
Nagdagdag si Fiola Ceballos ng 10 markers para sa 2-0 kartada ng High Speed Hitters na nakahugot ng siyam at walong puntos kina Erika Santos at Majoy Baron, ayon sa pagkakasunod.
Nagsosyo sa liderato ang PLDT at Chery Tiggo sa Pool B.
“Happy na nakuha iyong panalo, happy na nakapag-perform iyong mga second stringers,” sabi ni coach Rald Ricafort sa High Speed Hitters na nauna nang tinalo ang Creamline Cool Smashers.
Tumipa si Kath Arado ng 16 excellent digs at siyam na excellent receptions para sa kanilang depensa.
Umiskor si France Ronquillo ng 11 points para sa Highrisers na bumagsak sa 0-2 marka, samantalang may pitong marka si Thai reinforcement Sutadta Chuewulim.
Sa unang laro, bumira si American import Khat Bell ng 21 points mula sa 19 attacks at dalawang service aces para sa 25-16, 25-20, 25-23 paggiba ng Crossovers sa Nxled Chameleons.
Diniskaril ng Chery Tiggo ang misyong back-to-back wins ng Nxled na nakahugot kay American reinforcement Meegan Hart sa siyam na puntos.
Ito ang ikalawang straight sets win ng Crossovers matapos dominahin ang Farm Fresh Foxies sa pagbubukas ng komperensya.
“Malaking bagay na panalo kasi nga galing kami doon sa straight sets din na game sa first game namin,” ani Chery Tiggo coach Kungfu Reyes. “Maganda na iyong nakakauna eh, para at least iyong momentum bitbit namin.”
Nagdagdag si Player of the Game Ara Galang ng 11 points sa likod ng pitong attack at apat na blocks bukod sa 11 excellent digs.
- Latest