Officials: Track oval duna ray ginagmay nga kuwang

CEBU, Philippines — Nasulod ra sa 400 hundred meter standard ang kinatibuk-an nga track oval sulod sa Cebu City Sports Center apan aduna lamang mga ginagmay nga kuwang sa walo ka mga lanes sa oval.

Mao kini ang gihatag nga katin-awan sa Department of Education ug ang Cebu City Sports Commission bahin sa kontrobersyal track oval human nasukod sa gitahasang third party.

Ang lane one kuwang og 1.5meter, ang lane two, three ug four nagkuwang og 0.79, ang lane five 0.76 meter, ang lane six adunay kuwang nga 0.75, ang lane seven 0.73 ug ang lane eight 0.96 meters.

Sa kinatibuk-an 0.88 meters ang average nga kuwang sa sukod o 0.22 percent sa tibuok track oval matud pa sa chairman sa Cebu City Sports Commission John Pages.

Giklaro sab nila nga dili kini makaapekto sa resulta sa mga duwa nga gipahigayon sa track oval ug labaw na nga walay negatibong epekto sa integridad sa Palarong Pambansa 2024. Sayo niini gipadayag sa Cebu City nga gikinahanglan nga makorehian sa kontraktor ang sipyat kun gusto niini nga mabayran.  Ang kontraktor wala pa gihapon mopakita.

Ang mga opisyal nitug-an sab nga ilahang ilhon ang rekord nakadaug sa 110 meter dash apan kadtong 200 meters pataas dili una ilhon ang ilang rekord apan makadawat gihapon sila sa ilang mga medalya isip mananaog.

Si DepEd Assistant Secretary Francis Cesar Bringas nibutyag nga bisan pa sa mga isyu malamposon gihapon ang maong kalihukan.

Si acting Vice Mayor Dondon Hontiveros sa iyang bahin nibutyag nga naigo ra usab ang gigahin nga pundo sa Cebu City alang sa Palaro bisan og gilaslasan kini gikan sa P400 milyones ngadto nalang sa P262 milyones.

 Alas kwatro sa hapon kapin o kulang gisugdan ang Palarong Pambansa 2024 closing ceremony pinaagi sa parada sa mga delegado sa Cebu City Sports Center.

Gipasidunggan usab ug gihatagan og cash nga premyo ang eskuylahan nga gihimong billeting area sa mga atleta. Ang 3rd place nakuha sa Don Sergio Osmeña Sr. Memorial National High School (P8 mil); 2nd place ang Cebu City Don Carlos A Gothong Memorial National High School (P10 mil); 1st Place Tejero Elementary High School (P15 mil).

Samtang gipasidunggan sab ang pinaka-disiplinadong delegasyon: 3rd place Region 11 (P8 mil); 2nd place Mimaropa (P10 mil); ug 1st place Calabarzon (P15 mil).

Samtang Most organized delegation napili ang: 3rd place Region XII (P8 mil); 2nd place Caraga Region (P10 mil); 1st place Region XI (P15 mil).

Most Eco-friendly Award: 3rd place  Caraga Region (P8 mil); 2nd place Region 9 (P10 mil); 1st place Region 5 (P15 mil).

Digital Engagement Awards: 3rd place- Region 7 (P8 mil); 2nd place Region XI Davao (P10 mil); 1st place Region VI Western Visayas (P15 mil).  Pinakamatatag Award: 3rd place Region V (P8 mil); 2nd place Region IX (P10 mil); 1st place Caraga Region (P15 mil).

Most Bemedalled Athlete : 1st Region 4A Rizal Division 7-medals Albert Jose Amaro ; 2nd 6 medals Sheena Jillianne Ty Region 3 Olongapo City.

Most inspiring story award: 1st Asia Paraase Central Visayas ug 2nd Jerrymae Malinog Region 12.  Alas singko kapin sa hapon niabot si Vice President Sara Duterte aron sa pagtambong sa pagtak-op sa maong kalihukan kinsa nipasalamat sa tanan sa kalamposan sa Palaro.

 Si Duterte giduyogan nila ni acting Mayor Raymond Alvin Garcia, Governor Gwendolyn Garcia, Ilocos Norte Governor Matthew Manotoc sa pagtunol sa mga pasidungog ug sa overall winner.

Si Garcia mapasalamaton sa tanan sa kalampusan sa Palarong Pambansa.

 Ang sunod nga Palarong Pambansa 2025 ipahigayon sa Ilocos Norte. Si Manotoc sa iyang acceptance message nibutyag nga andam na ang Ilocos nga modawat sa mga atleta. Ang Palarong pambansa 2026 kay ipahigayon sa Agusan Del Sur. — IBM BANAT NEWS