Duha ka Sugboanong atleta gipasidunggan

CEBU, Philippines — Duha ka Sugboanong atleta ang gihatagan og pag-ila sa Probinsiya sa Sugbo tungod sa nahatag niini nga garbo sa Sugbo kabahin sa sports.  Sila si Sisi Rondina ug Thea Gagate mnidawat sa resolusyon nga gipasar sa hunta probinsyal paghatag kanila og pasidungog isip volleyball stars ug miyembro sa volleyball national team nga Alas.

Ang Alas Pilipinas nakasakmit og bronze medal atol sa Asian Volleyball Confederation Cup 2024 human gipildi niini ang grupo sa Australia.

Matud ni Bokal Glen Anthony Socco nga ang maong mga volleyball players angayan nga hatagan og pasidungog tungod kay nakahatag kini og garbo isip mga Sugboanon.

Si Rondina kinsa taga Lungsod sa Compostela niduwa pa kini sa GUV CUP sa Probinsiya sa Sugbo.

Si Rondina ug Gagate gikuyogan sa presidente sa Philippine National Volleyball Federation Ramon “Tatz” Suzara sa pagdawat sa pasidungog diha sa buhatan sa gobernador niadtong Hulyo 11, 2024.

Sa laing bahin, mapasigarbohon si Mayor Junard Ahong Chan sa Dakbayan sa Lapu-Lapu kang Asia Paraase gikan sa Pajo National High School nga maoy unang nakakuha og gold medal sa Central Visayas sa nagpadayon nga Palarong Pambansa 2024.

Matud pa ni Chan maka-touch kaayo ang gipakita nga sportsmanship ni Paraase ug susama sa duha ka gold medals ang naangkon niini tungod kay bisan sa iyang kahingutas nakahimo pa kini sa pagpabarog sa kompetinsiya niini sa lumba sa dagan.

Si Chan nagkanayon nga ang gihimo ni Paraase  usa ka tinuoray nga mananaog ug mapasigarbohon siya niini.

Gipahibalo usab sa mayor nga adunay giandam nga cash incentives ang siyudad alang sa mga taga Lapu-Lapu nga makakuha og gold, silver ug bronze medal sa Palarong Pambansa 2024. (Le Phyllis F. Antojado ug Rowena D. Capistran/BDB) BANAT NEWS