Nameke sa notaryo, sikop

CEBU, Philippines — Nadakpan ang usa ka 43-anyos nga babaye atol sa entrapment operation sa mga operatiba sa Criminal Investigation and Detection Group (CIDG) tungod sa giingong pagpalsipikar og public o official document pinaagi sa paggamit sa ngalan ug pirma sa usa ka abogado ug notary public.

Gipahigayon ang operasyon alas-5:48 sa hapon niadtong Septiyembre 4, 2026, sa eskina sa  M.C. Briones Street ug D. Jakosalem sa Barangay Santo Niño, Cebu City.

Ang nadakpan giila nga si Lovelyn, 43, residente sa Barangay Basak San Nicolas, Cebu City.

Sumala pa sa kapolisan,  mireklamo ang usa ka abogado nga gigamit matud pa og laing tawo ang iyang ngalan ug pirma alang sa notarization sa mga dokumento nga wala niya mismo gipirmahan o gi-notarize.

Atol sa entrapment operation, usa ka poseur-client ang nakigtransaksyon sa suspek human kini nitanyag og notarial services.

Nasaksihan mismo sa poseur-client ang pagbutang sa suspek og notarial seal nga nagdala sa ngalan reklamante ug misunod og pirma sa ngalan sa abogado, nga nagpakita nga ang maong abogado gyud ang  mipirma ug nag-notarize sa dokumento.

Gani atol sa operasyon, personal nga nikuyog ang abogado sa operating team.

Human maaresto ang suspek, gisusi niya ang dokumento ug gikumpirma nga dili iya ang pirma ug wala siya mopirma o mo-notarize sa maong dokumento.

Tungod niini, gipriso ang suspek ug giatubang ang kasong Violation of Article 172, Paragraph 1, in relation to Article 171, Paragraph 2 sa Revised Penal Code, o falsification of public/official document by a private individual.

Narekober gikan sa operasyon ang P500 entrapment money, duha ka affidavit of loss nga subject sa entrapment, usa ka ink pad, stamp pad, identification card, ug ballpen.

Ang suspek gidala sa CIDG Mandaue City Field Unit alang sa hustong documentation, booking ug disposition. (BANAT NEWS)