Gipapauli’g sayo tungod sa yellow alert

CEBU, Philippines — Sayo nga gipangbuhian ang mga tinun-an sa tanang pampubliko ug pribadong tunghaan sa mga Dakbayan sa Sugbo , Lapu-Lapu ug Mandaue tungod sa hulga sa kusog nga uwan ug baha kagahapon, Hulyo 31, 2026.

Sa Cebu City, gipagawas ni Mayor Nestor Archival ang direktiba subay sa rekomendasyon sa Cebu City Disaster Risk Reduction and Management Office (CCDRRMO) human sa pagbana-bana sa kahimtang sa panahon nga adunay kusog nga uwan ug posibleng pagbaha nga posibleng masinati pagbalik sa syudad sama sa nahitabo niadtong Hulyo 30.

Matud pa ni Konsehal David “Dave” Tumulak kinsa tsirman sa Cebu City Disaster Risk Reduction and Management Council, gisugyot nila ang sayong dismissal aron malikayan ang posibleng pagkatanggong sa mga tinun-an ug magtutudlo.

Base sa situation report sa CCDRRMO sa alas 2:02 sa hapon kagahapon, adunay mga lugar nga gibahaan ug padayon nga gi-monitor.

Lakip sa mga lugar nga gitaho nga nagbaha mao ang dapit sa Family Park sa Barangay Talamban diin miabot sa tuhod ang tubig, samtang gi-monitor ang dapit sa Il Corso sa South Road Properties (SRP) tungod sa pagbaha nga miabot usab sa tuhod ang gilawmon.

Padayon usab nga gibantayan sa Barangay Fire Brigade ug mga barangay-based responder ang Tejero ug Tinago Creek human misaka og 2 metros ang lebel sa tubig.

Girespondehan sab ang nahugno nga riprap sa Esperanza Street sa Barangay Tisa tungod sa pagbaha ug diin adunay pipila ka mga balay nga nangaguba.

Sa pagsuwat niining balitaa, gi-consolidate pa sa Department of Social Welfare Services kung pila ka mga pamilya ang apektado.

Bisan og sagunson na ang pag-uwan, wala pa’y gipatuman nga alert level sa syudad tungod kay wala pa usab nagpagawas og alerto ang PAGASA.

Suma pa ni Tumulak nga halos tanang barangay sa dakbayan ang naapektuhan sa kusog nga uwan niadtong Hulyo 30 gawas sa bukirang barangay.

Nakita sab ni Tumulak ang pagsagol sa mga basura, yuta ug lapok sa tubig baha nga timailhan nga adunay pagkabara sa mga drainage system.

Lakip sa grabeng naapektuhang lugar mao ang La Paloma sa Barangay Tisa, ingon man ang pipila ka bahin sa Barangay Lahug ug Bulacao. Matud pa ni Tumulak, daghang kadalanan sa dakbayan ang nalunopan ug adunay mga sakyanan nga natanggong tungod sa pagsaka sa tubig.

Aduna sa’y mga residente nga gi-rescue sa mga otoridad, lakip ang mga senior citizen sa Barangay Pit-os ug mga residente sa La Paloma.

Gipasabot usab ni Tumulak nga ang Highway Tagunol sa Barangay Basak Pardo usa sa mga lugar nga dali malunopan tungod kay dinhi nagtapok ang tubig gikan sa Quiot, Punta Princesa, Pardo ug Inayawan.

Samtang nagpadayon ang hulga sa pagbaha, giawhag ni Tumulak ang mga residente ilabina kadtong nagpuyo sa dali nga bahaan nga lugar nga maminaw ug motuman sa mga pahibalo gikan sa lokal nga kagamhanan.

Pasado alas dos sa hapon sa Lapu-Lapu City, gimando ni Mayor Ma. Cynthia “Cindi” King-Chan ang early dismissal human magpagawas ang PAGASA og Yellow Rainfall Warning.

 “The safety and welfare of our learners, teachers, and school personnel remain our highest priority,” matud ni King-Chan.

Giawhag usab sa mayor ang mga ginikanan nga makig-coordinate sa tagsa-tagsa ka eskwelahan alang sa hustong pagpapauli sa ilang mga anak.

Samtang, sa Mandaue City, gimando usab ni Mayor Thadeo Jovito “Jonkie” Ouano ang sayong pagpapauli sa mga estudyante sa tanang pampubliko ug pribadong eskwelahan base sa rekomendasyon sa City Disaster Risk Reduction and Management Office (CDRRMO).

Gihatagan nang daan og kagawasan ang mga school heads sa pagpatuman og localized class suspension o early dismissal depende sa kahimtang sa ilang tagsa-tagsa ka eskwelahan ug barangay.

 “Parents and guardians are encouraged to immediately fetch their children or make the necessary arrangements for their safe return home,” matud ni Ouano.

Matud ni School Physical Facilities Coordinator Moises Menderico, mga alas 11 sa buntag gisugdan na nila ang pagpahibalo sa mga ginikanan aron kuhaon ang ilang mga anak.

Wala nila tugoti ang mga bata nga mouli nga sila lang ug kinahanglan sundoon gyud sila sa ilang ginikanan o guardian.

 “Natagam man gud mi gahapon kay dugay nabuhian ba, mao tong pagdako sa tubig gipang-rescue sa CDRRMO nga boat,” dugang niya.

Usa sa mga ginikanan, si Jessie Villegas, miingon nga dali niyang gikuha iyang anak nga Grade 5 kay nabalaka siya sa pagbaha.

 “Hugaw baya kaayo na ang tubig gikan pa na sa sapa, di gyud maayo nga mahumol ang mga bata sa tubig,” matod ni Villegas.

Niadtong Hulyo 30, daghang mga estudyante ang na-stranded sulod sa maong eskwelahan human paspas nga misaka ang tubig-baha. – Kristin De Dios, IBM BANAT NEWS