Makasaysayanong daog Gilas mipatikangkang sa world no.6 Latvia

CEBU, Philippines — Ang Gilas Pilipinas misikad sa ilang kampanya sa FIBA Olympic Qualifying Tournament sa makasaysayanong paagi.

Kini human gibihag sa mga Pinoy ang World No.6 Latvia, 89-80, aron pahayagan ang ilang tsansa nga maka-abante sa semifinals sa Paris Olympic qualifiers kagahapon sa kaadlawon didto sa Riga Arena sa Latvia.

Mao kini ang unang daog sa Pilipinas batok sa usa ka European team sa usa ka torneyo sa FIBA sud sa 64 ka tuig.

Katapusan kini nilang nahimo sa dihang ilang gipayaka ang Spain, 84-82 niadtong 1960 Rome Olympics.

Si Justine Brownlee maoy nangu sa Gilas uban ang 26 puntos, siyam ka rebounds, ug siyam ka assits, samtang si Kai Sotto midugang og18 puntos ug walo ka rebounds.

Mismo si coach Tim Cone ang nakurat sa pagpatikangkang nila sa inilog nga Latvia.

"I'm totally shocked to be sitting in front of you guys after winning the basketball game," matud pa ni Cone. "This is not something we thought we're gonna do, I'll be honest with you."

Wala na molingi pa ang Gilas sukad giablihan ang duwa pinaagi sa nagbagang 8-0 run.

Mangtas kaayo ang Gilas nga usa ka higayon mi-abante og 26 puntos sa ikatulong kuwarter ug igo lamang nakapaduol ang Latvia ngadto sa otso puntos.

Si Dwight Ramos mihimo sab og kasikas uban ang 12 puntos ug pito ka rebounds ingon man ang Sugbuanong higante nga si June Mar Fajardo ug Chris Newsome nga nagkumboya'g 21 puntos alang sa Gilas nga nakigbugno pa batok sa Georgia sa pagsulat ning taho kagabii.