Nanimaho na’ng politika

Dul-an duha ka tuig pa sa dili pa ang sunod nga piniliay unya sa Mayo 2028 apan nanimaho na’ng eleksiyon sa dakbayan sa Sugbo.

Milakra na og sugod ang pagpangandam sa mga opisyal sa syudad alang sa umaabot bugnong lugaynon ug kini maklaro sa ilang mga lihok labi pa diha sa konseho. Dunay mga opisyal nga imong masabot nga nagsugod na nianang gitawag sa politika og “positioning.”

Duna hinuoy mga opisyal nga consistent sab gyud sa ilang baruganan sukad pa sa unang adlaw sa ilang pagpangalagad. Dili man dautan nga mamolitika ang atong mga opisyal kun kini ibutang sa hustong lugar. Gani mas makatabang pagbantay sa mga abuso ug pagbadlong sa pangurakot sa gobyerno ang hustong paagi sa pamolitika.

Usa sa labing awahing nahitabo sa konseho sa dakbayan sa Sugbo nga gitan-aw sa uban nga pamolitika mao ang resolution nga gipalabang niadtong Martes, Nobyembre 3, nga nag-awhag sa Commission on Audit (COA) pagpagawas sa ilang audit report giunsa paggasto ni kanhi mayor Raymond Garcia ang P50 milyones niyang intelligence fund niadtong 2024 ug 2025.

Una untang giduso ni Konsehal Pablo Labra II ang pag-awhag sa COA nga mohimo og special audit apan iyang giamendahan ang resolution pinaagi sa pag-awhag nalang nga hatagan ang konseho og kopya kun duna man silay audit findings.

Ang maong lakang gitan-aw sa uban nga pamolitika sanglit si Garcia giisip nga usa sa mga posibling kandidato pagkamayor sa 2028. Si Labra gitan-aw sab nga posibling maoy sunod ituboy sa BOPK pagkamayor labi pa nga daw sa duna nay guna ang relasyon nilang Vice Mayor Tomas Osmena ug Mayor Nestor Archival.

Kun politika may nagtukmod ni Labra, alang nako dili mahinungdanon unsay iyang motibo. Mas bug-at ug mahinungdanon nga masayran sa mga magbubuhis sa syudad giunsa paggasto ang P50M nga intelligence fund.

Labi na gyud kay mas kwestiyonable nga tulo ka adlaw sa wala pa mokanaog sa pwesto si Garcia nahitabo ang pag-release sa P10M nga kabahin sapundo niadtong 2025. Ang kanhi mayor miingon nga nakasabot siya sa gihimo sa konseho ug nisalig siya sa COA.

Mas maayo unta to nga direkta niyang gipasabot unsay nahitabo nganong tulo ka adlaw sa wala pa siya mikanaog nahitabo ang pagpagawas sap undo. Mas makatabang unta pagpatin-aw sa huna-huna sa mga tawong nagduda nga dunay anomaliya nga nahitabo kun gihikyad nalang niya og largo unsay gigastohan sa pundo tulo ka adlaw sa wala pa mapupos iyang termino.