Mga lagda sa pagsulod sa baboy sa Sugbo gipahugtan
CEBU, Philippines — Gipahugtan sa Sugbo ang mga lagda sa pagsulod sa buhing baboy, karneng baboy ug mga produkto niini aron mapugngan ang posibleng pagsulod ug pagkaylap sa African Swine fever (ASF) sa probinsiya.
Pinaagi sa Executive Order (EO) No. 55, series of 2026 nga gipirmahan ni Gobernador Pamela Baricuatro niadtong Oktubre 24, 2026 nga gikinahanglan nga mosunod sa mga regulasyon ug veterinary requirements ang tanang kargamento sa baboy ug mga produkto niini nga mosulod sa Cebu.
Lakip sa mga dokumentong kinahanglan ipresenta ang balidong shipping permit, veterinary health certificate ug laboratory test results nga nagpakita og negatibong resulta sa ASF pinaagi sa reverse transcription polymerase chain reaction (RT-PCR) kon gikinahanglan.
Tumong sa maong mando nga mapanalipdan ang industriya sa pagbuhi og baboy sa Cebu nga gibana-banang nagkantidad og P20 bilyones lakip ang panginabuhi sa mga hog raiser ug ang siguridad sa suplay sa pagkaon sa probinsiya.
Ubos sa mando, gihisgotan nga nagpadayon gihapon ang mga outbreak sa ASF sa Negros Island ug ubang probinsiya sa nasud hinungdan nga gikinahanglan ang mas hugot nga biosecurity measures aron malikayan ang pagkaylap sa maong sakit.
Gibutyag usab sa provincial government nga ang usa ka kaso sa ASF nga nadiskobrehan sa usa ka lokal nga kagamhanan sa habagatang bahin sa Cebu dali nga nakontrolar pinaagi sa mga lakang sa surveillance ug biosecurity.
Matud sa mando nga 24 na ka local government units (LGUs) sa Cebu ang nakadawat sa Recognition of Active Surveillance on African Swine Fever (RAS-ASF) gikan sa Bureau of Animal Industry (BAI) human sa surveillance ug laboratory testing nga gipamatud-an sa Regional Animal Disease Diagnostic Laboratory sa Department of Agriculture.
Ang ubang LGUs nagpadayon pa sa ilang surveillance ug evaluation aron mahatagan usab sa maong recognition.
Ubos sa EO 55, ang tanang buhing baboy, karne sa baboy ug processed pork products kinahanglan mosunod sa nasudnong regulasyon ug makapresenta sa kompleto nga mga dokumento sa dili pa tugotan nga mosulod sa Cebu.
Gikinahanglan usab ang Meat Inspection Certificate o Certificate of Meat Inspection alang sa karne gikan sa mga establisamentong akreditado sa National Meat Inspection Service (NMIS), disinfection certificate sa transport vehicle ug livestock handlers' permit gikan sa Department of Agriculture.
Alang sa mga pork products, kinahanglang adunay License to Operate ug Certificate of Product Registration gikan sa Food and Drug Administration (FDA).
Ang mga buhing baboy nga mosulod sa Cebu kinahanglang adunay klarong destinasyon nga slaughterhouse nga lisensiyado ug akreditado sa NMIS.
Gitugotan lang ang pagsulod sa mga baboy nga direktang dad-on sa maong pasilidad alang sa pag-andam og lechon.
Dili tugotan nga tipigan alang sa breeding o ibaligya pag-usab ang maong mga baboy.
Kinahanglan kini’ng dad-on deretso sa slaughterhouse nga nahimutang sa ilang mga dokumento.
Gimando usab nga ang tanang kargamento nga mosulod lang sa opisyal nga mga pantalan diin adunay veterinary quarantine officers nga mosusi sa mga dokumento ug mosusi usab sa mga hayop o produkto.
Ang mga kargamento nga kulang sa dokumento, walay klarong destinasyon o nilikay sa gitakdang quarantine ports mahimong kompiskahon o ibalik sa ilang gigikanan. Ang mga lokal nga kagamhanan, Cebu Port Authority, Philippine Coast Guard ug Philippine National Police maoy gisaligan sa pagpatuman sa mga lagda sa mga pantalan, tugpahanan ug mga checkpoint. BDB BANAT NEWS
- Latest
















