Arcilla: Mass transport mao ray solusyon

CEBU, Philippines — Gitan-aw ni Konsehal Alvin Arcilla nga ang pagpalig-on sa mass transport maoy labing epektibong solusyon sa nagkagrabe nga kahuot sa dagan sa trapiko sa dalan sa Barangay Banilad paingon na sa Barangay Talamban sa Dakbayan sa Sugbo.

Atol sa pagtuki sa kontrobersyal nga estriktong implementasyon sa Oplan BanTal: Discipline Zone sa Bantal corridor, gihulagway ni Arcilla nga “experimental” lang ang pasiunang implementasyon sa Cebu City Transportation Office (CCTO) alang sa bag-ong sistema sa trapiko tungod kay nakita niya nga nagkinahanglan pa og padayon nga pag-adjust aron masuwayan ang labing epektibong pamaagi sa pagdumala sa dagan sa trapiko.

Tuod man, giila sa konsehal nga lisod pa sa pagkakaron nga masulbad ang trapiko sa Banilad ug Talamban tungod sa kusog nga urbanisasyon ug pagdagsa sa mga sakyanan sa maong lugar.

Gipahinumdoman ni Arcilla ang konseho sa kasaysayan sa dagan sa trapiko sa Talamban ilabi na kadtong mibalhin ang Sacred Heart School ngadto sa Canduman ug samtang anaa usab sa maong koridor ang Cebu International School.

Gisaysay niya nga grabe ang kahuot sa dagan sa trapiko tungod kay ang mga mokuha ug hatud sa mga tinun-an adunay mga kaugalingong sakyanan.

Matud pa niya nga sa dihang gitugotan ang Sacred Heart School sa pagtukod sa Canduman sa Dakbayan sa Mandaue, adunay kondisyon nga bus ug coaster lang ang makasulod sa tunghaan kun diin pangkuhaon ang mga tinun-an sa mga pick-up stations sa nagkadaiyang dapit sa siyudad lakip ang Ayala ug Banilad aron maminusan ang pribadong sakyanan nga mosulod sa tunghaan.

“More or less, mass transport. Dili puwedeng individual nga sakyanan ang mosulod,” iyang pasabot.

Giingon sab ni Arcilla nga bisan nagkahuot ang dagan sa trapiko sa unang semana sa operasyon sa tunghaan apan dali ra sab nga mihapsay ang dagan sa trapiko tungod kay bus ug coaster ang nagkarga sa kadaghanan sa mga tinun-an.

Sa sitwasyon sa BanTal corridor, gihulagway ni Arcilla nga mohuot ang dagan sa trapiko sa maong lugar tungod kay nagkadaghan na ang mga residente sa Talamban tungod sa mga relocation site ug bag-ong residential developments.

Sumala pa niya nga sa kasagaran sa mga panimalay sa Talamban adunay motorsiklo tungod sa mao kini ang pinakadali nga matang sa transportasyon.

Bisan pa sa mga reklamo batok sa unang duha ka adlaw sa implementasyon sa Oplan BanTal, giingon ni Arcilla nga base sa iyang obserbasyon ug sa datos sa CCTO, mas mihapsay na ang dagan sa trapiko ilabi na kung buntag tungod sa pagbag-o sa sistema.

Apan nagpabilin ang iyang baruganan nga dili lamang pinaagi sa pagbag-o sa sistema sa trapiko ang tubag sa problema sa trapiko sa BanTal apan pinaagi sa epektibong mass transport system. — /IBM (BANAT NEWS)