EDITORYAL - Discipline Zone unta tanan

Karong adlawa, Agosto 5, 2026  ipatuman na ang Banilad-Talamban Discipline Zone sa Cebu City Traffic Office nga parte sa tinguhang masolusyonan ang problema sa trapiko sa maong lugar particular ang Gov. Cuenco Avenue.

Gipahibalo sa CCTO nga estriktuhon na nila og maayo ang implimentasyon sa mga lagda sa trapiko diha sa maong dalan.

Apil ana ang pagpataka og hunong sa mga sakyanan ilabi na ang mga pasaheroan nga bisag asa lang mohunong para magpakanaog ug magpasakay og pasahero.

Ang Ban-Tal area usa sa mga grabe kabug-at ang dagan sa trapiko ilabi na panahon sa peak hours.

Naa diha nahimutang ang daghang mga establisamento ug mga dagkong unibersidad ug mga residential areas.

Pero naay mga nangutana kun unsa may naka-espesyal anang BanTal area nganong diha man gyud ipatuman kining discipline zone ug nganong dili man sa dalan Colon o sa ubang mga dagkong karsada sa siyudad nga parehas sad nakasinati og problema sa trapiko panahon sa peak hours?

Sa dalan Colon, estrikto man pud ang pagdakop sa mga pataka og parking o pataka og diskarga ug pagpasakay og pasahero, kana kung naay gabantay nga traffic enforcers ug depende ra pud sa oras.

Unya naa say anti-jaywalking nga ordinansang gipatuman sa diha, apan sa crossing ra pud sa Osmeña Blvd.ug Colon pero wala sa ubang mga eskina sa maong dalan.

Naa say nakabantay anang mga nagbantay nga anti-jaywalking enforcers kay usahay makita man silang maglabang-labang ra sa dalan bisan go signal pa samtang nakakita ang mga pedestrians nga nagpaabot sa signal para makalabang.

Kung disiplina gyud sa trapiko ug sa pedestrians ang tumong nganong dili man nila kini buhaton sa tanang mga dalan sa Cebu City ug wala sad untay pili kung kinsa ray estriktong pasundon sa mga lagda.

Mas maayo gani kung kaning dalan Colon maoy ilang giuna og estrikto kay anhi halos tanan mag-abot ang mga tawo ug naay mas daghang mga eskuylahan, mga establisamento ug uban pa dinhi.