Hulga sa mga eskuylahan giseryoso

CEBU, Philippines — Gipalig-on karon ang "security measures" sa Consolacion ug Talisay City human sa nagpadayon nga pagkatag sa social media sa usa ka online threat nga sa mga estudyante ug mga eskwelahan.

Sa Consolacion, gipahunong ang face-to-face classes sa pipila ka eskwelahan isip precautionary measure samtang gipadayon sa kapulisan ang imbestigasyon sa maong viral nga hulga.

Matud ni Consolacion Mayor Teresa "Nene" Alegado, wala nila pasagdi ang nahitabo bisan pa og adunay pagduhaduha sa kamatuoran sa naglibot nga screenshot.

Sumala niya, ang desisyon sa pagsuspenso sa klase gihangyo mismo sa pipila ka school heads aron matugotan ang hapsay nga imbestigasyon ug masiguro ang kaluwasan sa mga estudyante ug magtutudlo.

"That was upon the request of the head teachers. Some of the school heads ni-request nga ila lang sa'ng e-settle... dili sa nato pwede nga ato lang ibalewala. We really have to do investigation," matud pang Alegado.

Ang mga naapektuhang eskwelahan mao ang Consolacion National High School, San Narciso School, Tayud National High School ug Tayud Elementary School, Tolotolo National High School ug Tolotolo Elementary School, ug Tugbongan National High School ug Tugbongan Elementary School.

Samtang suspendido ang face-to-face classes, gipabalhin ang mga estudyante sa modular ug ubang alternative learning modalities.

Gibutyag usab ni Alegado nga sa Domingo sa gabii pa siya unang nakadawat sa screenshot pinaagi sa text ug messenger.

"Akong hunahuna dili ni tagaan og pagtagad kay mao naman ni uso... But secondly, let us not also take this for granted," dugang pa sa mayor.

Human niini, iyang gikontak ang hepe sa kapulisan ug mga opisyal sa eskwelahan aron maberipika ang impormasyon.

Gikataho usab sa mga school officials nga adunay mga estudyante nga bag-ohay lang gisita tungod sa paggamit sa cellphone hinungdan nga ilang gisusi kon aduna ba silay kalabotan sa viral nga mensahe.

Sa imbestigasyon, nasayran nga ang screenshot unang naabot sa usa ka estudyante sa pribadong eskwelahan sa Barangay Casili.  Apan ang maong estudyante milimod nga siya ang naghimo niini ug miingon nga gipasa ra usab kaniya ang mensahe.

"Ni-deny ang bata nga dili to iya. It was also forwarded to her unya iya ra'ng gi-share. It's sad because it really spread to the extent nga naabot pa gani sa Liloan."

Bisan og giingong wala pay nakitang immediate physical threat, gipahugtan gihapon sa Consolacion LGU ang seguridad sa tanang eskwelahan pinaagi sa dugang deployment sa mga polis ug SWAT personnel, higpit nga access control, ug koordinasyon sa cybercrime investigators aron mailhan ang responsable sa pagpakatag sa hulga.

Sa ulahi, gipahibalo sa LGU nga mobalik na ang regular nga klase karong adlawa human sa inisyal nga findings sa kapulisan nga walay direktang hulga sa mga estudyante ug school personnel.

Giila usab sa mga imbestigador ang usa ka TikTok account nga naggamit sa display name nga "Charlie Kirk" isip sinugdanan sa mensahe ug gisubay na kini karon sa PNP Anti-Cybercrime Group  kun kinsay tag-iya niini.

"I will ask my legislative department to study more what is very applicable at this point in time... We will not take this for granted."

Samtang sa Talisay City, wala gipatuman ang citywide suspension sa klase apan gipalig-on ang seguridad sa mga eskwelahan samtang gipadayon sa kapulisan ang verification sa maong online threat.

Matud ni Mayor Gerald Anthony "Samsam" Gullas, acronym lamang sa mga eskwelahan ang makita sa posts.

Bisan pa niini, gipadayon sa Talisay City ang pag-deploy sa kapulisan aron modugang sa police visibility ug inspeksyon sa mga campus.

Pero naay usa ka eskwelahan nga nisuspenso gyud sa klase isip pag-amping, desisyon nga giingong girespeto sa city government.

Apan wala sila makakita og basehan aron ipatuman ang citywide suspension tungod kay wala pay napamatud-ang piho ug kredibleng hulga batok sa tanang eskwelahan sa dakbayan. (BANAT NEWS)