Titulo ng lupang iniaalok beripikahin - Solon

Para sa LRT1 Cavite Extension

MANILA, Philippines — Pinayuhan ni Las Piñas Lone District Rep. Mark Anthony Santos si Acting Transportation Secretary Giovanni Lopez na agad beripikahin kung ang lupang iniulat na iaaalok ng mga may-ari ng lupa bilang donasyon para sa Light Rail Transit Line 1 (LRT-1) Cavite Extension Project ay may malinis at walang anumang sagabal o pananagutang titulo bago ito tanggapin ng pamahalaan.

Ayon kay Santos, dapat magsagawa ang Department of Transportation (DOTr) ng masusing legal at teknikal na pagsusuri upang matiyak na ang nasabing lupa ay walang sangla (mortgage), lien, adverse claim, o anumang iba pang legal na hadlang na maaaring magdulot ng panibagong pagkaantala sa matagal nang naantalang proyekto ng riles.

“Dapat magsagawa ang DOTr ng masu­sing due diligence. Bago tanggapin ang anumang lupang ido-donate, kaila­ngan muna nitong tiyakin na mali­nis ang titulo at wala itong anumang legal o pinansyal na sagabal na maaa­ring magdulot ng karagdagang problema sa pamahalaan,” ani Santos.

Binigyang-diin ng mambabatas na ­hindi dapat umasa ang pamahalaan sa mga pampublikong pahayag lamang. Aniya, kinakailangang humingi ng kumpleto at sapat na dokumentar­yong ebidensya upang maprotektahan ang interes ng mga nagbaba­yad ng buwis at matiyak ang napapanahong pagkumpleto ng P64.915-bilyong LRT-1 Cavite Extension Project.