Binata todas sa bugbog ng mag-ama

Pamangkin ipinagtanggol

MANILA, Philippines — Isang 33-anyos na binata ang patay matapos pagtulungang bugbugin ng isang mag-ama matapos ipagtanggol ang kaniyang menor-de-edad na pamangkin sa Quezon City.

Batay sa report, dead-on-arrival sa East Avenue Medical Center (EAMC) ang biktimang si alyas “Ballesteros”, rider, ng Lower Bernardo, Brgy. Pasong Tamo, Quezon City habang agad ding nadakip ang suspek na si alyas “Cabatan”, 22, binata at tugis ang ama nito na si alyas “Rommel”, kapwa construction worker, at residente ng Magsaysay St., Brgy. Pasong Tamo ng nabanggit na lungsod.

Sa imbestigasyon ni PSSg Prince Joy Rivera ng Quezon City Police District (QCPD) Holy Spirit Police Station (PS-14), naganap ang insidente bandang alas-9:30 ng gabi noong Linggo, Nobyembre 8 sa Freedom St., sa nasabing barangay.

Bago ang insidente, kinompronta ng biktima ang binatilyong kapatid ng suspek na si Cabatan na sumampal sa kanyang pamangkin. Nagsumbong ang binatilyo sa mga suspek hanggang sa mauwi sa suntukan kung saan natalo si Cabatan at kumuha ng kahoy. Dito na pinagpapalo ng kahoy at pinagsusuntok ng mga suspek ang biktima.

Inihahanda na ang kaso laban kay Cabatan habang tinutugis pa ang nakatakas na amang si Rommel.