Tambay arestado sa pambabato sa mga sasakyan
MANILA, Philippines —Dinakip ng mga tauhan ng Makati City Police Station ang isang 29-anyos na tambay na naaktuhan ng mga nagpapatrulyang pulis sa pambabato sa mga dumaraang sasakyan sa Osmeña Highway, bahagi ng Makati City, Sabado ng madaling araw.
Sa ulat kay Makati CPS chief P/Colonel Pedro Alagano, Jr., ininguso ng mga residente ang suspek na si “Armando,” residente ng Taguig City, sa mga pulis kaya siya nilapitan.
Nang sinasaway na, dakong alas-12:15 ng madaling araw ng Hulyo 25, pumalag at minura pa ng suspek ang mga pulis na mga tauhan ni Makati police chief P/Col. Pedro Alagano, Jr. kaya napilitang lagyan ng posas bago binitbit sa Makati-Police Sub-Station 4.
Nang rikisahin ang dalang backpack, isang hindi lisensyadong kalibre .38 revolver na kargado ng isang bala.
Bukod sa kasong Resistance and Disobedience to a Person in Authority at Alarm and Scandal, ipinagharap din ng reklamong paglabag sa Republic Act 10591 (Comprehensive Firearms and Ammunition Regulation Act) sa Makati City Prosecutor’s Office.
- Latest
