Hurot kwarta niini

Ang kagamhanan sa siyudad sa Sugbo naghatag og cash assistance ngadto sa mga senior citizens ug Persons with Disabilities (PWD) nga kantidad og tag P1,000 kada buwan.

Gitan-aw man gud sa mga opisyal sa siyudad nga angayang tabangan ang mga senior citizens ug PWD kay daghan kanila ang way mga trabaho ug dunay mga maintenance nga tambal.

Kini lang nga gastohanan ang siyudad mogasto na og dul-an sa P2 Billion sa usa ka tuig. Apan karon, si Cebu City Councilor Harry Eran gusto sab nga apilon paghatag og hinabang ang mga Solo Parents.

Ubos sa balaod ang gitawag og Solo parent mao ang ginikanan sa bata nga way bana, o way asawa nga katambayayong sa pag-atiman ug pagpadako sa iyang anak.

Pending pa kining maong ordinansahon diha sa Cebu City Council. Tan-aw nako, kon aprobahan kini sa atong mga konsehal, unya uyonan usab sa mayor, mosubra na sa P2 Billion ang gastohon alang sa cash assistance.

Ambot og may kwentada na ba kaha si Konsehal Eran sa gidaghanon sa mga solo parents dinhi sa Cebu City? Gusto sab ni Eran nga magmugna og opisina nga modumala sa panginahanglan sa mga Solo Parents.

Aw, kon maaprobahan kining tinguha ni Eran, humot kaayo siya sa mga Solo Parents kon moabot ang higayon nga magpapili siya pag-usab pagka konsehal sa election karong 2028.

* * *

Uy, tulo ka prosecutors sa Mandaue City gipasakaan og kasong kriminal ug administratiba didto sa Ombudsman-Visayas tungod kay matud pa wa nila hatagi og higayon ang tawo nga gipasakaan og kaso aron makatubag sa pasangil batok niya, ug maong nalutsan kini og warrant of arrest.

Si Byron Garcia, igsuon sa kanhi gobernador sa Sugbo, miila sa gipasakaan niya’g kaso nga mao sila si Mandaue City Prosecutor Mary Francis M. Daquipil; Deputy City Prosecutor Sarah Vanessa M. Lacno, ug si Associate Prosecutor Mariven B. Calamba.

Gipasabot ni Garcia nga kining tulo ka government prosecutors maoy naghupot sa reklamo nga gipasaka batok kaniya ni Capitol health consultant Elisse Nicole Catalan, nga namasangil nga nakalapas si Byron sa balaod nga gilatid sa Safe Spaces Act kay maisip nga mibugal-bugal kaniya.

Matud ni Byron nga wa gyud siya pahibaw-a sa tulo ka prosecutors nga dunay kaso nga gipasaka batok kaniya aron unta iya kining matubag.

Si Byron miingon nga nakahimo og kalapasan sa Section 3 (e) sa Republic Act 3019, kun Anti-Graft and Corrupto Practices Act and tulo ka prosecutors, ug giawhag usab niya ang Ombudsman nga tan-awon ang administrative lapses sa maong mga opisyal sa Department of Justice.

Na hala, huwaton nato kon unsay kalamboan niini nga kaso.