Transport strike, tinapatan ng libreng sakay ng DOTr
MANILA, Philippines — Tinapatan ng Department of Transportation (DOTr) at iba pang ahensiya ng pamahalaan ng libreng sakay ang unang araw ng 2-araw na transport strike ng grupong Manibela kahapon.
Sa abiso ng DOTr, nabatid na ang free rides na kanilang ipinagkakaloob ay available mula 7-10 ng umaga at mula 5-8 ng gabi.
Kabilang sa mga ruta ng libreng sakay ay Welcome Rotonda-Fairview at pabalik; Recto-Cubao via Nagtahan at pabalik; Quiapo-Cubao via E. Rodriguez at pabalik; Quiapo-Fairview at pabalik; Kalentong-Pasig Palengke at pabalik at PITX-Lawton at pabalik.
Ipinairal umano nila ang inisyatiba, katuwang ang Philippine Coast Guard (PCG), Department of Energy (DOE), Department of Public Works and Highways (DPWH), Department of Economy, Planning and Development (DepDev), at Department of Labor and Employment (DOLE).
Nitong Miyerkules, umarangkada ang transport strike ng Manibela, na magtatagal hanggang ngayong Huwebes, upang iprotesta ang patuloy na pagtaas ng presyo ng mga produktong petrolyo.
- Latest
