Si Padre Oscar Camomot

Niadtong seminarista pa ako kanunay ko sa balay ni Padre Oscar Llanos Camomot.

Pag-umangkon kadto ni Obispo Teofilo Camomot. Sikat kadto siya kun maghisgot kita sa liberation theology.  Siya pud kadtong utanganan sa mga seminarista sa mga libro sanglit siya man outlet sa Claretian Publications.  Daghang mga seminarista ug gani nangapari na ang uban ang wala pa gyud kabayad sa ilang utang. Pintok ug dulot sa bukog siya manulti.  Walay pilion ug bisan kinsa ka pa.

Pilay dagan sa sugilanon nilabay ang daghang mga katuigan napari ko.

Sa pagsugod sa diocesan process sa canonization cause ni Obispo Teofilo, natahasan ko isip sakop sa Historical Committee nga mohimo og research sa kinabuhi sa maong obispo.

Mao pud tong higayona nga si Padre Oscar nasakit pud og prostate cancer.

Sa among kukabildo ako siyang giingnan nga sangpiton ang iyang uyoan aron siya mamaayo.

Apan miingon siya ngari kanako: “Wala na ko mangayo ana Rey, ang akong pagkaamgo sa akong mga sayop usa naman ka dakong Milagro!”

Pipila ka adlaw gikan niadto namatay siya.

Ang milagro dili lang mahitungod sa mga extraordinary nga mga panghitabo.

Hinunoa ang mga milagro mao ang kausaban sa kinabuhi sa tawo human madungog ang mensahe sa Dios.  Sama sa nahitabo sa mga taga Nineveh nga human makadungog sa wali ni Jonas sila nagbag-o ug naghinulsol.

Kita pud unta atong himoon ang matag adlaw nga kahigayonan alang sa kabag-ohan… Amen. Padre Oscar kun asa ka man, salamat sa kasinatian.