Hayahay sa mga tapolan

Alang sa mga kasarangan o middle-income nga mga trabahante, bug-at kaayo ang buhis nga otomatik nga i-deduct sa payroll. Dili gyud kabalibad, ilabi na kadtong mga kompanya nga "sipsip" (loyal kaayo) mo-remit sa buhis ngadto sa kagamhanan.

Dunay mga trabahante nga 32% sa sweldo ug bisan gani sa bonus ang kuhaon sa gobyerno depende sa tax bracket. Sige ta og wadwad sa trabaho, pero sa atong buhis, dili gyud ta katilaw kung dunay ayuda nga ipanghatag ang gobyerno kay kadtong mga nag-ilaid man sa kalisod ang priority nga hatagan. Mama-sanaol nalang ta ani.

Gipahibawo ni President Ferdinand "Bongbong" Marcos Jr. nga manghatag og dugang ayudang pinansyal ubos sa UPLIFT (Unified Package for Livelihoods, Industry, Food, and Transport) nga gitumong alang sa 7.5 ka milyong kabus ug ubos og kita nga pamilyang Pilipino (nga naglakip sa gibanabanang 37.5 ka milyong Pilipino).

Ang kinatibuk-ang payout nga moabot hangtod sa ?12,000 matag pamilya sulod sa unom ka bulan ipanghatag sa mga kwalipikadong trabahante ug pamilya, nga adunay kinatibuk-ang badyet nga ?12.375 bilyon. Pagkadakoa!

Dili malungtarong solusyon: Ang gihimong rason sa ayuda mao ang kalisod nga mugna sa krisis sa Middle East nga hinungdan sa pagsaka sa presyo sa lana ug ubang produkto. Apan ang paghatag og direktang ayuda o dole-out usa lamang ka temporaryong solusyon. Dili kini makasulbad sa pundamental nga gigikanan sa kakabos ug inflation.

Sa pikas bahin, ang minilyon nga pundo nga gigasto alang sa ayuda mas maayong ipundok sa mas malungtarong mga proyekto sama sa, Pagpalambo sa sektor sa agrikultura aron mobato ug mopaobos sa presyo sa pagkaon, Pagpauswag sa lokal nga industriya ug paghimo og dugay ug desenteng mga trabaho.

Kuyaw sa "dole-out mentality": Ang sige'g hatag og cash aid makamugna og dole-out mentality, diin ang pipila ka tawo mas magpaabot na lang sa tabang sa gobyerno imbes nga mangita og mas permanente o mas taas nga kita.

Sistema sa pagpili sa benepisyaryo: Dugang pa, dako gihapon ang peligro sa leakage ug paboritismo sa listahan sa CBMS ug DSWD, diin ang pipila ka tinuod nga nagkinahanglan wala gihapon kwalipikado o wala nalakip sa listahan, samtang ang uban nga dili kaayo kabus makadawat hinuon.

Pagkawalay inisyatibo sa structural fuel relief: Gipasangil nga ang ayuda tubag sa pagsaka sa presyo sa lana sa Middle East. Apan imbes nga mogasto og ?12.375 bilyon sa cash transfers, mas epektibo ug direkta unta para sa tanang lungsanon kung suspensohon o kunhoran ang Excise Tax sa petrolyo ubos sa TRAIN Law samtang taas ang presyo sa kalibotan.

      Asa ang hustiya? Ang mga nagkugi malt himoong gatasan nga ipasuso sa mga tapulan, dili man tanan pero ka daghan gyud pair pa sa panyawan. Praktis ta og tinapolan Aron ayuda sa kagamhanan matilawan.