Lady passenger nahulog, nabangga ng truck
Tinadyakan palabas ng jeep
MANILA, Philippines — Malubhang nasugatan ang isang babaeng pasahero matapos umanong itulak at tadyakan palabas ng jeep bago mabangga at pumailalim sa isang trailer truck sa Osmeña Highway, Maynila kamakalawa.
Ayon sa Manila Police District (MPD), naganap ang insidente dakong alas-2:00 ng madaling araw. Agad isinugod sa ospital ang biktimang kinilalang alyas “Ana” para sa gamutan.
Batay sa CCTV ng Barangay 739, Zone 80, makikitang nahulog ang biktima sa harapan ng jeep nang itulak at tadyakan ng asawa ng driver na katabi niya sa loob ng sasakyan.
Sakto namang dumating ang trak at natumbok ito at pumailalim. Hindi man siya nasawi, nagtamo naman siya ng malubhang pinsala at nangangailangan ng operasyon.
Ayon sa imbestigasyon, pauwi na umano ang biktima at ang kasama niyang lalaki matapos magtinda sa Padre Faura Avenue. Sinabi naman ng barangay na nagkaroon ng komosyon matapos pagsuspetsahan ng asawa ng driver na tatakas sa pamasahe ang magkaibigan.
Itinanggi naman ng driver ng jeep at kanyang asawa ang alegasyon at iginiit na sila umano ang hinarang at ginulo ng ilang bystander. Patuloy pa ring inaalam ng mga awtoridad ang pagkakakilanlan ng driver ng trailer truck.
- Latest
