Archival mopahigayon sa iyang SOCA karon

CEBU, Philippines — Si Cebu City Mayor Nestor Archival, Sr. gikatakdang mopahigayon sa iyang State of the City Address (SOCA) karong adlawa diin itaho niini ngadto sa katawhan ang iyang mga nahimo lakip ang gilaoman sa mga residente nga makabaton og mga solusyon sa mga bug-at nga problema.

Ang mga Sugbuanon naglantaw dili lang sa seremoniyas ug nag-awhag sa mayor nga mohatag og konkretong mga solusyon sa mga bug-at nga problema sa siyudad lakip ang paglabay sa basura, disaster resilience, suplay sa tubig, kahuot sa trapiko, pagbaha, wala nahuman nga imprastraktura ug balay alang sa mga pamilyang nawad-an og puy-anan, mga hagit nga nasugatan sa iyang unang tuig sa katungdanan.

Base sa kamandoan sa mayor nga and SOCA ipahigayon atol sa inaugural session sa 17th Sangguniang Panlungsod sa alas 2:00 sa hapon dili alas 11:00 sa buntag base sa unang pahibalo.

Ang opisyal nga programa nga gi-release sa Public Information Office magsugod sa pormalidad diin mosunod ang pakigpulong ni Bise Mayor Tomas Osmeña ug dayon ang SOCA ni Archival diha sulod sa session hall diin ang maong kalihokan i-live kini diha sa Facebook.

Gilaoman nga i-highlight ni Archival ang programa sa panglawas lakip ang Cebu City Medical Center nga gisaad niini nga makompleto sa Disyembre karong tuiga. Posibleng lakip sa hisgotan ni Archival ang nagpadayon nga paghawan sa mga drainage, mga inisyatibo sa siguridad sa pagkaon, mga lakang sa pagpamenos sa epekto sa El Niño, mga programa sa kahapsay ug kalinaw, suporta sa edukasyon ug tabang sa trapiko.

Apan ang mga residente nangayo og dugang aksyon alang sa umaabot imbes nga magtumbok lang sa mga nahimo na ilabi na kabahin sa pagdumala sa solid waste.

Ang environmental groups ug ang mga residente nag-awhag kang Archival sa pagpresenta og usa ka malungtarong plano subay sa iyang kaugalingong mga gipasiugdahan

Gikaho nga human sa pakigpulong sa mayor, ang konseho magsugod na sa pag-adopt sa bag-ong house rules alang sa fiscal year 2026-2027, magpili og opisyales ug i-reorganize ang kasamtangang mga komitiba. —The Freeman