Lima nadakpan tungod sa pekeng Magic Sarap

CEBU, Philippines — Lima ka indibidwal ang nadakpan sa usa ka entrapment operation tungod sa matud pa pagpamaligya og pekeng “Magic Sarap” nga gipahigayon sa Criminal Investigation and Detection Group (CIDG) Mandaue City Field Unit, alas 7:30 sa gabii niadtong Hulyo 4, 2026, sa Zuelig Avenue, Barangay Subangdako, Mandaue City.

Ang operasyon giubanan sa mga sakop sa Regional Special Operations Team (RSOT), Regional Intelligence Unit 7 (RIU-7), ug mga otorisadong representante sa Nestlé Philippines, Inc., sa koordinasyon sa Mandaue City Police Office Station 2.

Ang lima ka suspetsado gituohang nagbaligya ug nag-apod-apod og peke nga Magic Sarap seasoning gamit ang trademark sa Nestlé Philippines.

Ang.mga dinakpan giila nga sila si alyas "Win" , 50 anyos, negosyante ug residente sa Sitio Kawayan, Barangay Gun-ob, Lapu-Lapu City nga maoy target sa entrapment operation. alyas "Cha" 51 anyos, tindera ug residente sa Barangay Basak, Tamiya, Lapu-Lapu City kinsa maoy usa sa mga target sa entrapment operation, alyas "Jane", 27 anyos, tindera ug residente sa Barangay Day-as, Cordova, Cebu ,alyas " Ed" 63 anyos, drayber sa trak ug residente sa Barangay Basak, Tamiya, Lapu-Lapu City ug alyas "Tony" 56 anyos, residente sa Marawi City –nga pulos giila sa kapulisan nga kauban sa mga target sa operasyon.

Sumala sa imbestigasyon, usa ka police operative isip buyer ug mipalit og 113 ka kahon nga seasoning.

Human sa transaksyon, gisusi dayon sa awtorisadong representante sa Nestlé Philippines ang mga produkto ug gikumpirmar nga peke kini ug wala gihimo o giapud-apod sa kompanya.

Matud pa ni Atty. Clarence Evangelista Representative of Nestle Philippines ug Product Expert nga peke ang mga food seasoning nga gibaligya sa mga dinakpan.

Giawhag ni Evangelista ang mga legitimate nga grocery stores adto mamalit sa maong produkto sa mga otorisadong tigbaligya niini aron dili mabiktima sa mga peke nga producto.

Matud pa ni alyas Cha nga gikan sa Tubigon, Bohol ang mga peke nga seasoning ug igo lang kini nilang gi pickup. Giangkon sab niyang nasayod siya nga ang ilang gibaligya nga mga seasoning peke kini.

"Kibaw ko nga peke kay abi naman makabarato unya ang code lang daan niya mao lagi walay panginabuhi nisud nalang mi sa ingon ani," sigon ni alyas Cha.

Tungod niini, gidakop ang lima ka suspetsado tungod sa paglapas sa Sections 155 ug 168, in relation to Section 170 sa Republic Act No. 8293 o ang Intellectual Property Code of the Philippines.

Nasakmit sa operasyon ang 113 ka kahon sa peke nga Magic Sarap,usa ka Mitsubishi L300 nga gigamit sa paghatod sa mga produkto,nga adunay gibanabanang kantidad nga P1,292,400, marked entrapment money, ug uban pang ebidensya. — /IBM (BANAT NEWS)