Risa Na! Movement gilusad dinhi sa Sugbo

CEBU, Philippines —  Nagtapok sa siyudad sa Sugbo kagahapon Hulyo 4 ang nagkalaing-laing sectoral ug progresibo nga grupo alang sa paglusad sa “Kalig-on sa Bisaya, Ipakita! Risa Na!” movement.

Kini naghatag og senyales alang sa ilang pagsuporta kang Senator Risa Hontiveros sa umaabot nga 2028 presidential elections.

Gipahigayon diha sa Aznar Coliseum sa Southwestern University, ang kalihukan gitambongan sa mga partisipante gikan sa kabatan-onan, academe, fisherfolk, LGBTQ+ community, kababayen-an, professionals, religious organizations, ug labor groups, apil na ang Partido Manggagawa, SENTRO, Samahang Magdalo, ug ubang mga supporters.

Usa sa highlight sa kalihukan ang recorded video message gikan ni kanhi senator Antonio “Sonny” Trillanes IV, ang founding chairman sa Samahang Magdalo, kinsa midasig sa mga supporters nga palig-onon ang Risa Na! Movement ug padayon nga tukoron ang nationwide grassroots organization agig pagpangandam sa sunod nga national elections.

Suma ni Trillanes ang movement adunay duha ka primary objectives: una mao ang pagpangandam sa 2028 elections ug pag establisar og hiniusang organisasyon nga makahimo sa pagpalihok sa mga supporters sa bisan asang dapit sa nasud.

Gihimug-atan niya ang panginahanglan alang sa pag-umol og lig-on nga leadership structure nga makagiya sa nagkalain-laing local chapters sa mosunod nga mga buwan.

Gidayeg usab niya si Hontiveros, nga kanunayng mibarog batok sa kusganong mga interes sa politika ug nagpabiling matinud-anon sa pagpauswag sa kaayohan sa mga Pilipino sulod sa mga katuigan sa pagserbisyo publiko.

Mitambong usab sa kalihokan ang political content creator nga si Lovely Granada, nga mipaila sa iyang kaugalingon isip tigpasiugda sa maayong pangagamhanan ug nag-awhag sa mga tigsuporta nga padayon nga mosuporta sa mga lider nga adunay integridad.

Ang paglunsad sa Risa Na! Movement sa Sugbo kabahin sa mas halapad nga paningkamot sa mga tigsuporta aron mahiusa ang grassroots organizations sa tibuok nasod samtang ilang giawhag si Hontiveros nga modagan isip presidente sa 2028.

Sa miaging pagbisita ni Hontiveros sa Sugbo, iyang giingon nga seryoso niyang gikonsiderar ang posibilidad sa pagdagan isip presidente sa umaabot nga eleksyon.