Cebu Landmasters Batch 2003, ARQ Batch 2001 mipaduol sa finals

CEBU, Philippines — Ang Cebu Landmasters Batch 2003 ug ARQ Batch 2001 mibugha sa tagsa-tagsa nila ka mga karibal aron pagpanoktok sa Division A finals sa Sacred Heart Ateneo Alumni Basketball Athletic Association (SHAABAA) Season 29 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Si Justin Huang mipabuto og 28 puntos uban ang walo ka rebounds ug usa ka assist samtang si Daryle Tan mirehistro og double-double nga 21 puntos ug 15 ka rebounds nga iyang gipakapinan og upat ka steals ug usa ka assist sa dihang gilampaso sa Batch 2003 ang Big Three Pizza Batch 1996, 79-61, sa pasiunang duwa sa ilang best-of-three semifinals  series.

Ang Batch 2003 alkansi og singko puntos, 18-23, human sa unang kuwarter apan human mipuwersa og 33-33 nga panagtabla sa halftime, ilang giikastigo ang Batch 1996 sa second half diin sila miabante og 20 puntos, 79-59, sa hilimatyong segundos.

Si Roderick Mangubat mihipos og 16 puntos, upat ka rebounds ug usa ka assist samtang si Paulsen Uy mitali oig 10 puntos apan sa way kapuslanan alang sa Batch 1996.

Sa laing engkwentro sa semis, si Jason Arquisola mipupo og 16 puntos, walo ka rebounds, ug upat ka steals sa dihang giunhan sa Batch 2001 ang Core Pacific, 62-56.

Si Mark Hing mikulit og double-double nga 13 puntos ug 10 ka rebounds samtang si Wendell Ong midugang og 10 puntos ug upat ka rebounds alang sa Batch 2001, kansang 22 puntos nga bentaha, 46-24, sa sayong bahin sa ikatulong kuwarter nahanaw.

Apan ang Batch 2003 mipakita og igong katakos taliwala sa madasigon nga resbak sa Core Pacific aron pagipsot ngadto sa sayes puntos nga kadaogan.

Si  Joel Co maoy nanbgu sa Core Pacific uban ang 26 puntos, 15 ka rebounds, ug upat ka assists samtang si Jeremy Huang milansang og 10 puntos, lima ka rebounds, ug usa ka assist sa pildirong kawsa.