Celtics mi-trade ni Brown sa 76ers alang kang George

CEBU, Philippines — Ang bitoon sa Celtics nga si Jaylen Brown mopadulong sa Philadelphia 76ers sa usa ka makapakurat nga NBA nga maghatud ni Paul George sa Boston.
Gawas ni George, ang Boston makadawat sab og duha ka first-round draft picks ug duha ka second-round picks sa umaabot sigun sa nalatid sa kasabotan nga nagtuldok sa 10 ka tuig nga pagsalida ni Brown uban sa Celtics.
Sa maong mga seasons, ang Celtics kanunay nga nakasud sa playoffs. Nakaabot sila sa Eastern Conference finals sud sa unom ka higayon ug kaduha sa NBA Finals.
Si Brown gipasidunggan nga Finals MVP sa dihang nakampiyon ang Celtics niadtong 2024.
Sa miaging season, nagpabiling lig-on ang Celtics bisan og wala makadula og 66 ka duwa si Jayson Tatum tungod ni Brown.
A five-time NBA All-Star mi-average og 28.7 puntos, 6.9 rebounds ug 5.1 assists matag duwa aron tabangan ang Celtics pag-angkon sa No.2 seed sa Eastern Conference.
Apan ang Boston wala makapahimus sa dako nilang 3-1 nga labaw sa serye ug nahagba sa mga kamot sa Sixers sa unang hugna sa playoffs.
Ang 76ers nanghinaut nga sa pag-abot ni Brown aron makig-alyansa nilang Joel Embiid, Tyrese Maxey ug VJ Edgecombe, mosamot kalig-on ang ilang puwersa.
Ang Sixers nakatikang sa playoffs sud sa walo ka higayon sa katapusang siyam ka tuig apan kutob lamang sila pirme sa ikaduhang hugna kon conference semifinals.
Sa laing bahin, ang beteranong forward nga si Tobias Harris, nga nagkupot og dakong papel sa dihang ang Detroit Pistons miposte sa labing nindot nga rekord sa Eastern Conference sa miaging season, gikataho nga mobalhin sa San Antonio Spurs isip usa ka free agent.
Samtang ang Lakers nagpalig-on dayon human nanamilit ang alas nilang si LeBron James.
Apil sa nakuha sa Lakers ang 24-anyos nga sentrong si Walker Kessler pinaagi sa usa ka trade uban sa Utah Jazz hulip sa duhga ka first-round draft picks.
Human niini, gipangbira sab sa Lakers ang tulo ka free agents nga sila si Sandro Mamukelashvili, Quentin Grimes, ug Colin Sexton.
Ang atensiyon padayon hinoon nga napunting ngadto ni James kon asa kini moduwa sa ika-24 niyang season sa NBA.
Apil sa mga opsyon ni James mao ang pagbalik sa Cleveland Cavaliers o Miami Heat o makig-uban ni Stephen Curry sa Golden State Warriors.
Sa uban pang mga kasikas, ang Celtics milabni sa sentrong si Mitchell Robinson, nga lab-as pang nakampiyon uban sa New York Knicks, samtang si Norman Powell, nga mi-average og 21.7 puntos matag duwa uban sa Heat sa miaging season, motapon sa Chicago Bulls.
- Latest
















