Karaang mga atraso
Unsay labot sa pagkulata ni Sara Duterte ni court sheriff Abe Andres niadtong 2011, dihang mayor pa siya sa Davao City, sa iyang pag-angkon nga nikontrata og tawo (nga nahibaw-an sa National Bureau of Investigation nga opisyal sa gibungkag nang Vice Presidential Security and Protection Group) nga patyon silang Presidente Ferdinand Marcos Jr., First Lady Liza Araneta Marcos ug kanhi House Speaker Martin Romualdez kon dunay mahitabo niya?
Mosunod ang lehitimong mga rason nganong mapuslanon ang testimoniya ni Andres sa impeachment trial ni VP Sara nga sugdan karong Hulyo 6:
* * *
1. Makatabang si Andres pagkumbinser sa senator judges nga ang duguong pagkalumping sa iyang nawong 15 ka tuig nang nilabay momatuod nga si VP Sara dili kapugong sa iyang kaugalingon kon masuko (posibleng tinuod ang mga bugalbugal nga nangita ang House panel of prosecutors sa ubang nakulatahan dihang nag-eskuyla pa hangtod na-politiko na);
2. Makapasabot si Andres nga ang kapakyas pagsilot sa krimen ni Sara batok ni Andres ug uban pang mga atraso nga wala pa mahibaw-i posibleng maoy nakapagara niya dili lang sa paghudlat kon dili sa aktuwal gyod nga paggamit og puwersa (apil ang gikatahong paglabay og laptop ngadto sa usa sa iyang mga abogado karong tuiga) batok ni bisan kinsa nga mangahas sa pagsukwahi niya;
* * *
1. Mapahinumdoman ni Andres ang mga institusyon nga ang kapakyas paghimo sa ilang trabaho (sama sa pagyaka sa Korte Suprema sa disbarment case nga gipasaka human sa pagpangulata ug ubang kalapasan sa mga lagda sa pagka abogada, ug imbes manalipod niya nipalayas sa tibuok niyang pamilya gikan sa Davao aron dili tiwasan sa mga Duterte, ug sa pagpangiyugpos sa Korte Suprema ug tibuok makinarya sa gobyerno apil nang Senado ug House of Representatives sa laktod nga pinatyanay sa drug war ni kanhi Presidente Rodrigo Duterte) dili moresulta sa kaayuhan sa nasud ug sa katawhan; ug
Mahimong inspirasyon si Andres sa ubang mga nahiagom sa pangabuso nga dunay mas gamhanang puwersa nga mopahimutang sa tanan aron nga ang mga biktima bisan unsa nila kagamay makakuha og hustisya ug ang mga nidaug-daog nila bisan unsa ka-higante mapaninglan ra gihapon sama sa pagkapriso sa The Hague ug sa pagkahinayon sa impeachment trial.
* * *
- Latest
