Tolenada kinuha ng Foxies

MANILA, Philippines — Kinuha ng Farm Fresh si Fil-American setter Iris Tolenada para sa 2026 Premier Volleyball League (PVL) On Tour na papalo sa susunod na buwan.

Nagmula si Tolenada sa Capital1 Solar Spikers at sa kanyang paglalaro sa Foxies ay makakapalitan niya sa posisyon si Fil-Am playmaker Alohi Robins-Hardy.

Inaasahang malaki ang maitutulong ni Tolenada sa Farm Fresh na pinamumunuan nina Trisha Tubu, Ces Molina, Ara Galang, Royse Tubino, Mylene Paat at Jolina Dela Cruz.

Bukod sa Capital1, isinuot din ni Tolenada ang mga uniporme ng Pocari Sweat at F2 Logistics bukod sa paglalaro para sa GS Caltex Seoul Kixx sa V-League ng South Korea.

Nauna nang nakuha ng Foxies ni Japanese coach Koji Tsuzurabara sina middle blocker Roselyn Doria-Aquino at libero Buding Duremdes.

Ipaparada rin ng Farm Fresh sa PVL on Tour sina 2026 PVL Draft No. 6 overall pick Jonna Perdido at No. 11 selection Ela Raagas.

Hahataw ang preseason tournament sa Hulyo 8 sa Ilagan City, Isabela tampok ang bakbakan ng Akari at ZUS Coffee sa alas-4 ng hapon kasunod ang salpukan ng Creamline at Nxled sa alas-6:30 ng gabi.

Sasalang ang Farm Fresh sa Hulyo 11 sa Batangas City katapat ang Galeries Tower.