Kaugmaon nga gilumsan

Sa pagtingog sa asawa ni Tab Baldwin, ang head coast sa Ateneo Blue Eagle nga gisuportahan pa gyud sa ilang adopted daughter, naghatag kini og ideya kon unsa siya nga matang sa pagkatawo ilabi na sa pag-handle sa mga bata nga ubos sa iyang pagbansay bansay.

Ma-imagine nato kong unsa siya ka estrikto ug walay kasingkasing kong training na ang hisgotan kinsa buhaton ang tanan basta masunod lang ang iyang gustong ipatuman nga programa nga alang kaniya makapabaskog ug makapakusgan sa iyang mga players.

Maayo man alang kaniya ang tumong apan dautan ang resulta alang sa mga players ilabi na sa mga bag-o ug batan-on sama nilang Rene Baterbonia ug Divine Adili nga nakabsan gyud sa kinabuhi atol sa ilang pagbansay bansay.

Matud sa asawa ni Baldwin nga kapila ka higayon siya nagpasidaan sa Ateneo de Manila University nga "dili luwas ang mga bata" uban ni Baldwin ug gihangyo niya ang eskwelahan nga tangtangon kini. Apan wala siya paminawa ug gibalwawala kinsa nahulog pa siya maoy dunay deperensiya.

Basin alang sa tunghaan away pampamilya lang ug gusto lang sa asawa nga panimaslan ang iyang bana kon unsa man ang ilang misunderstanding.

Kung tinuod man nga gipasagdan lang sa Ateneo kini nga mga warning, dako kini nga kakuwang sa maong institusyon. Katungdanan sa eskwelahan ang pagsusi sa bisan unsang hulga sa kaluwasan sa mga estudyante.

Giingon ni Efi nga ang kamatayon sa mga magduduwa "predictable and preventable" (mapanglantawan ug pwede untang mapugngan). Ang usa ka head coach maoy nagsilbing ginikanan sa mga atleta samtang anaa sa training.

Ang timing sa iyang pag-expose naghatag og timaan nga ang trahedya agi sa kakuwang sa pag-amping o pagpabaya. Alang sa mga kabanay sa biktima, mas sakit paminawon nga duna nay mga pasidaan sa una pa nahitabo ang trahedya.

Ang nakaparat kay gitago sa naglangkob sa coaching staff ug mismo sa tunghaan ang pamaagi sa pagbansay sa mga atleta nga inay naandan nga basketball gihimo naman hinoon kining military training o extreme enduarance level training nga delikado alang sa mga bag-o pa nga nisalmot.

Una nang gipadayag sa inahan ni Baterbonia nga kong nasayod pa siya nga ingon niini ang matang sa training ang himoon dili gyud siya mosugot bahala pa og mag ilaid sila sa kalisod.

Gipahimutang na sa Ateneo si Baldwin sa usa ka "leave of absence" samtang nagpadayon ang imbestigasyon. Apan giatubang karon sa eskwelahan ang duha ka dakong problema: ang imbestigasyon sa nahitabo sa Aurora, ug ang pangutana sa publiko kung unsa nay nahibal-an sa tunghaan sa una pa mahitabo ang trahedya. Dili kini pwedeng isipon lang nga ordinaryo nga away-magtiayon.

Walay bili ang mga korona sa basketball o ang dungog sa usa ka coach kung itandi sa kinabuhi ug kaluwasan sa mga estudyante. Angay lang nga i-apil ang mga estorya sa asawa ni Baldwin sa nagpadayong imbestigasyon sa kapulisan aron mahatagan og hustisya ang mga biktima.

Angayan usab motingog pa ang mga estudyante nga nakasinati og sama nga kasinatian ilabi na kadtong hapit gyud madisgrasya.

Kumusta kaha ang kahimtang sa pangutok niining coach Baldwin? nasayod ba kaha ang Ateneo sa pamaagi sa training ug kong nasayod man nganong ilang gitugotan? Dili lang ang coach ang angayan nga manubag kon dili apil na ang tunghaan sa dakong pagpasagad nga ilang nahimo nga nisangpot sa kamatayon sa duha ka mga batan-on nga dako pa unta kaayo ug kaugmaon apan nawala human nila gilumsan.