Air quality sa Maynila, nasa ‘good level’ na
MANILA, Philippines — Magandang balita dahil nasa ‘good level’ na ang air quality sa lungsod ng Maynila bagamat hinihikayat pa rin ang Manileño na magsuot ng face mask.
Ayon sa Department of Environment and Public Services – Manila, naitala ang ‘Good’ Air Quality Index (AQI) sa apat na air quality monitoring stations ng lungsod, nitong Abril 27, 2026, ganap na alas-7:00 ng umaga.
Nabatid na kabilang sa mga monitored areas sa ilalim ng Asia Blue Skies Project ang Puregold Tayuman, Anda Circle, San Sebastian Residences, at Sta. Ana Hospital.
Ipinapakita anila nito ang mas malinis at mas ligtas na kalidad ng hangin sa mga nasabing lugar.
Gayunman, pinapayuhan pa rin ang mga Manileño na patuloy na magsuot ng face mask bilang karagdagang proteksyon, lalo na ang mga bata, senior citizens, buntis, at may respiratory illness.
Paniniguro pa nito, “Patuloy ang Pamahalaang Lungsod ng Maynila, sa pamamagitan ng DEPS, sa pagbabantay sa kalidad ng hangin upang mapangalagaan ang kalusugan ng publiko.”
- Latest
