PNP palalakasin kampanya vs abusadong online platforms
MANILA, Philippines — Inihayag ng Philippine National Police (PNP) na palalakasin nila ang kanilang kampanya laban sa mapang-abusong online lending platforms kasunod ng naitalang mahigit 47,000 reklamo na natanggap ng PAOCC mula Agosto 2024 hanggang Enero 2026 .
Ayon kay PNP Chief PGen. Jose Melencio Nartatez Jr., kabilang sa mga reklamo ang pagpapadala ng pagbabanta, public shaming, at iligal pag-access sa contact list ng mga kliyente. May mga kaso rin umano ng manipulated pictures upang takutin at ipahiya ang mga nangutang.
Giit ni Nartatez, hindi katanggap-tanggap ang ganitong uri ng operasyon at kinakailangan na itong aksyunan ng pulisya.
Dahil dito, inatasan ng PNP chief ang Anti-Cybercrime Group na magsagawa ng mas pinaigting na operasyon upang matukoy, maaresto, at makasuhan ang mga sangkot sa online harassment, paglabag sa data privacy, at iba pang cybercrime offenses.
Nakikipag-ugnayan na rin ang PNP sa PAOCC, Securities and Exchange Commission, at National Privacy Commission upang matukoy ang mga kumpanyang lumalabag sa batas.
- Latest
