200 pamilya nasunugan sa Tondo
MANILA, Philippines — Tinatayang nasa 200 pamilya ang nawalan ng tahanan nang tupukin ng apoy ang nasa 100 bahay sa isang residential area sa Tondo, Maynila kahapon ng madaling araw.
Batay sa ulat ng Manila City Disaster Risk Reduction and Management Office (DRRMO), dakong ala-1 ng madaling araw nang sumiklab ang sunog sa Gate 10 ng Parola Compound sa Brgy. 20, sa Tondo.
Sinasabing nagsimula ang sunog sa isang unit sa ikalawang palapag ng isang tahanan sa lugar.Wala namang iniulat na nasaktan o nasawi sa sunog.
Mabilis na kumalat ang apoy sa mga tahanang karamihan ay gawa lamang sa light materials at umabot ito sa ikalimang alarma bago tuluyang naapula dakong alas-5:26 ng madaling araw.
Nabatid na nasa 14 na trak ng bumbero mula sa Bureau of Fire Protection (BFP) at mahigit 60 fire volunteers ang rumesponde upang maapula ang sunog.
Base sa datos mula sa Barangay 20, nasa 100 istraktura ang winasak ng sunog, kung saan apektado ang nasa 200 pamilya o humigit-kumulang 600 na indibidwal.
Sa pagtaya naman ng BFP, nasa P400,000 ang halaga ng mga ari-ariang napinsala dahil sa sunog habang patuloy pang iniimbestigahan ang pinagmulan ng apoy.
- Latest
