Commuter nakakita ng mga ipis sa MRT-3
MANILA, Philippines — Agad na siniyasat at dinisinfect ng pamunuan ng MRT-3 ang isang train set matapos may pasahero ang mag-post sa commuter Facebook group na may nakitang maliit na ipis sa pagitan ng mga upuan at handrail.
Lumabas ang report nang magpakalat ng mga larawan ang pasahero at i-share ng ibang commuter.
Sa pahayag nitong Biyernes, Marso 6, sinabi ng MRT-3 na naabisuhan agad sila ng naturang post at ipinagawa ang agarang inspeksyon sa apektadong tren.
Inutusan ni Transportation Secretary Banoy Lopez si MRT-3 General Manager Michael Capati na imbestigahan agad at aksyunan ang report, ayon sa opisina ng linya.
Naglabas ng Notice to Explain si Capati para sa Sumitomo Corp., ang private firm na nakaatas sa maintenance ng MRT-3.
“Agad na sinailalim ng maintenance team ang nasabing train set sa inspeksyon at disinfection,” ani MRT-3 office sa pahayag, sa salitang Ingles.
Giit ng pamunuan na may regular na paglilinis at inspeksyon sa lahat ng train sets at istasyon bilang bahagi ng maintenance program ng linya, at tiniyak nilang patuloy ang pagpapaigting ng mga hakbang para sa kalinisan at kaligtasan ng mga pasahero.
- Latest
