‘Life’ sa 3 pulis pinagtibay ng SC

Pagpatay kay Kian delos Santos

MANILA, Philippines — Pinagtibay ng Korte Suprema ang hatol ng mababang hukuman na mabilanggo ng hanggang 40 taon ang tatlong pulis na responsable sa pagpatay sa 17-anyos na si Kian delos Santos noong 2017, sa panahon ng war on drugs ni ­dating pangulong Rodrigo Duterte.

Sa isang desisyon na isinulat ni Associate Justice Jhosep Y. Lopez, napatunayan ng Supreme Court (SC) Second Division na nagkasala sa pagpatay sina Arnel Oares, Jeremias Pereda, at Jerwin Cruz. Pinagbabayad din ng korte ang mga ito ng P275,000 bilang danyos.

Naganap ang pamamaslang noong gabi ng Agosto 16, 2017, na ayon sa mga saksi, ang mga pulis na huminto ay kinapkapan si Kian sa Baesa, Caloocan City. Sa kabila ng pag-iyak at pagmamakaawa na may eksaminasyon siya kinabukasan ay binitbit siya, dinala sa madilim na lugar malapit sa isang ilog, at binaril at nagtamo ng 2 bala sa ulo at 3 sa katawan.

Samantala, binago ng SC ang hatol ng RTC at Court of Appeals (CA) na walang eligibility para sa parole ang mga pulis kahit pinagtibay ang desisyon na lahat ng elemento para sa kasong murder ay nakita partikular ang kawalan ng pagkakataon na ­ipagtanggol ang sarili ng biktima.

Ayon sa SC: “the ­killing of a minor could not be considered standard in this operation” at hindi kasama sa pagganap sa tungkulin ang pumatay.

Gayunman, inalis ng SC sa ipinataw na parusa ang “without eligibility for parole.”