PNP at CGHMC pinagtibay medical partnership

MANILA, Philippines — Muling pinagtibay ng Philippine National Police (PNP) at ng Chinese General Hospital and Medical Center (CGHMC) ang ugnayan sa isang Memorandum of Agreement na nagsisiguro ng tuluy-tuloy na medikal na tulong para sa mga pulis na nasusugatan habang ginagampanan ang kanilang tungkulin.

Kinatawan ni PMGen Constancio Chinayog, Jr., Director for Personnel Records and Management, si Acting Chief, PLtGen. Jose Melencio C. Nartatez, Jr. sa isang seremonya na ginanap noong ika-19 ng Nobyembre 2025 sa CGHMC sa Sta. Cruz, Manila.

Binigyan-diin ni Chinayog ang kahalagahan ng patuloy na suporta para sa mga kawaning pulis alinsunod sa PNP Focused Agenda. Ang muling pagpirma sa MOA ay indikasyon na hindi nag-iisa ang pulis. Karapat-dapat makatanggap ng agarang, de-kalidad, at may malasakit na medikal bilang pagkilala sa kanilang sakripisyo at dedikasyon.

Pinasalamatan naman ni PNP Spokesperson PBGen. Randulf T. Tuaño ang CGHMC sa patuloy na suporta at pang-unawa sa mga pangangailangan ng mga pulis. “Ipinapakita ng partnership na ito ang tunay na halaga ng matibay na ugnayan sa pagitan ng komunidad at institusyon,” ani Tuaño.

Dumalo rin mula sa CGHMC at sa Philippine-Chinese Charitable Association, Inc. (PCCAI) ang kanilang mga kinatawan na sina Mr. Antonio Tan, Chairman of the Board; Dr. Benito Goyokpin, Honorary Chairman at Executive Committee Chairman; Mr. Kelly Sia, President and CEO; Mr. Alberto Tan Lee, Vice Chairman; Mr. Manuel Co, Vice Chairman; at Mr. Jameson Dy, Vice Chairman.