Pulis na tirador ng convenience store, timbog
MANILA, Philippines — Isang pulis Quezon City ang dinakip matapos na amining siya ang nangholdap sa isang convenience store noong Oktubre 23 ng madaling araw sa Quezon City.
Batay sa report ng Quezon City Police District (QCPD), ang suspek na pulis ay nakatalaga sa DHSU, QCPD ay inaresto sa loob ng Camp Karingal habang naka-duty bandang alas-9:35 ng umaga nitong Linggo.
Ang pagkakadakip sa pulis ay kasunod ng reklamo ng 7/11 na hinoldap ng suspek noong Oktubre 23 bandang ala-1 ng madaling araw sa Banawe St. ng nabanggit na lungsod.
Lumilitaw na hinoldap ng pulis ang convenience store at tinutukan ng baril ang cashier. Nakuha ng suspek ang nasa P2,000 kita ng convenient store saka agad na tumakas sakay ng kanyang motorsiklo. Aminado naman ang suspek sa kanyang ginawa at sinabing nagsa-sideline siya bilang ride hailing app driver dahil sa problema sa pera.
Agad na dinisarmahan ang suspek at sasampahan ng kasong kriminal at administratibo.
- Latest
