Vintage bomb, nadiskubre sa imburnal

MANILA, Philippines — Isang vintage bomb ang nadiskubre habang nagsasagawa ng declogging sa isang drainage sa Sampaloc, Manila kahapon ng umaga. 

Batay sa ulat ng Sampaloc Police Station 4 (PS-4) ng Manila Police District (MPD), nabatid na dakong alas-10:35 ng umaga nang madiskubre ang naturang vintage mortar sa imburnal na matatagpuan sa Negros St., kanto ng Visayan St., sa Sampaloc.

Nauna rito, nagsasagawa umano ang mga tauhan ng subcontractor na Eight J ng declogging operation sa drainage system sa naturang lugar, nang madiskubre nila ang naturang bomba.  

Kaagad naman umano nila itong ini-report sa mga pulis upang maimbestigahan.

Narekober naman ng mga pulis sa lugar ang bomba na may sukat na 60 milimetro at intact ang safety pin.